Xefe Deparamentu Gabinete Jeneru, Superintendente Julia da Gama hatete, enkontru ida ne'e nu'udar programa prioridade estratejika PNTL nian ne’ebé mak trasadu ona iha tinan 2018, mai remata iha tinan 2022.

“Entaun ohin ne'e loron importante ida ba feto, katak feminina PNTL tenke halo enkontru boot ida ne’ebé mak simplesmente atu trasa planu, servisu ida ka programa ida ba selebrasaun sermónia loron feto internasionál ne’ebé mak deklara tiha ona konvesaun ONU nian iha tinan barak liu ba”, dehan Julia, iha Salaun Enkontru Kuartel Jerál PNTL, Kaikoli, kinta (17/02).

Tanba ne’e papel feto mak atu desemina informasaun liuhusi loron eventuál sira hanesan ne'e. Tanba ne’e, enkontru ida ne'e gabinete Jeneru trasa ona iha fulan kotuk hodi enkontru hamutuk ho femenina PNTL liliu ba feto potensiál sira, no pontu fokál gabinete jeneru nian iha 12 munisípiu, no RAEOA inklui departamentu komandu jerál nian.

“Iha enkontru ida ohin, ha'u atu deklara tan dala ida katak la'ós mai trasa de'it planu selebrasaun loron feto internasionál nian ne’ebé sei selebra iha loron 8 fulan-marsu agora, maibé ita mós halo estratejia ida aprejenta ita-nian rekomendasaun no dezafiu sira ba ita-nian komandu ba estratejika hametin feto nian partisipasaun haree ba programa rekrutamentu, no promosaun sira”, dehan nia.

Alende iha enkontru ne'e PNTL femenina sira hato’o mós sira-nian preokupasaun no dezafiu sira ba komandu PNTL, nune'e bele aprejenta ba Governu. (*)