Komandante PNTL, Munisípiu Dili, Superintendente Xefe Henrique da Costa hatete, atu halo prevensaun ba kazu tuda malu komandu Dili sei hahú intensiva patrolla la'o ain iha tempu kalan.

“Patrolla la'o ain ne'e atu prevene no antisipa problema ne'ebé mosu iha futuru, entaun eskuadra sira hotu no komandu Munisípiu rasik liuhusi forsa rezerva sira halo patrolla la'o ain, no patrolla karreta ba fatin sira ne'ebé mak suspeita bele mosu problema", dehan Komadante Henrique, iha komandu Munisípiu Dili, Kaikoli, kinta (03/02).

Ho patrollamentu la'o ain ne'e sei envolve mós Unidade Espesiál Polísia (UEP), no Servsiu Informasaun Polísia (SIP) hodi kontrola hamutuk situasaun.

Aliende ne'e mós, Komadante Munisípiu Dili husu ba sidadaun hotu atu labele fahe informasaun falsu hodi halo populassun paniku.

"Kona-ba ita sira uza mídia sosiál ne'e, ita mak hakarak halo paniku ita-nia komunidade sira, ita mak hakarak fahe tutan imajen hirak ne'ebé mak akontese iha tinan hirak ba kotuk, hakarak halo moris filafali, halo paniku ita-nia komunidade sira, tanba ne'e husu ba sidadaun hotu, bainhira atu fahe imajen ba públiku tenke informasaun ne'ebé mak kredivel no loos”, hatete nia.

Haree ba imajen ne'ebé fó sai katak ema oho malu tan iha Tasitolu ne'e la loos, tanba fotografia ne'e akontese iha tinan 1999.

Enkuantu husi akontesementu tuda malu iha Tasitolu polísia detein ema na’in-28 ho motorizada, no identifika uma ida hetan sunu, inklui ema ida hetan kanek.

Suspeitu ne’in-28 halo ona identifikasaun iha de'it na’in-25 mak detein iha sela, restu PNTL liberta tanba minoridade.

Prosesu tomak investigasaun kriminál, Munisípiu Dili aprezenta ona ba Ministériu Públiku no sira sei kompleta oras 72. (*)