Sasán ne'ebé joven na’in-2 hatama ilegál mak hanesan, mina-rai no atributu Grupu Arte Marsiál (GAM) husi Ikatan Keluarga Silat Putera Timor-Leste (IKS-PTL).

"Sidadaun na’in-rua ne’e membru PNTL detein tanba halo tranzasaun ilegál iha liña fronteira, hodi hatama atributu treinu nia inklui mina rai,no ami-nia membru UPF halo operasaun ne’ebé lidera husi Segundu Komandante kompaña hamutuk ho Servisu Sekreta UPF nian Kaptura no prende ho karreta tipu mikrolete ida ho númeru matríkula 37.161”, dehan Komandante UPF, Superintendente Euclides Belo, liuhusi telefone, sesta(17/12).

Joven na’in-rua ne’e ida ho inisiál TdC tinan 37 husi Salele-Wetaba, Suku Beiseuk, Postu Tilomar ne’ebé hatama mina-rai litru 350 hamutuk masa sanulu.

Enkuantu, joven ida seluk nu’udár treinadór GAM iha ranting Grotu-Same ho naran inisiál AS tinan 32, husi Aldeia Puscam (kampung 3), Suku Grotu, Postu-Administrativu Same Vila, ne’ebé na’in ba atributu arte marsiál IKS nian.

Hafoin halo identifikasaun ba AS nu’udár na’in ba atributu organizasaun IKS deklara katak, atributu sira ne’e tama husi Timor-Osidentál liuhusi fronteira tasi iha loron 14 dezembru tuku ida kalan iha área Mota Masin nian ne’ebé fasilita husi timoroan ida naran EsA tinan 30, hela iha Salele Bot, Suku Lalawa, Postu-Administrativu Tilomar.

Entretantu atributu organizasaun IKS nian ne’ebé hatama ilegál iha fronteira no UPF konsege prende iha loron 15 dezembru mak hanesan farda treina IKS pares 82, kamizola IKS 21, envelopeelope logo IKS 74, kalung Q 42, Masimidar Pengesahan ho logo IKS 78, sertifikadu IKS 1, sabuk 1, poster guru besar 1, ID card IKS 1, Livru IKS 1 no Poster Keluarga Besar IKS 1

Daudaun ne’e joven na’in-rua hamutuk ho evidénsia sira ne’e entrega ona ba Komandu PNTL Munisípiu Covalima, hodi kontinua ba prosesu investigasaun no sei prosesa tuir lei ne’ebé vigora iha Timor-Leste. (*)