"Nu'udar ema, nu'udar sidadaun ha'u sente laran moras ho liafuan ida dehan ezonera, ha'u la entende Portugés tanba dalaruma liafuan ne'e midar ba ha'u-nia povu sira maibé ba ha'u ida intende ne'e Portugés ha'u sente ne'e hanesan xoke ida ba ha'u-nia privadu ba ha'u-nia personalidade hanesan ema hanesan sidadaun”, dehan Coliate iha Kuartel Jenerál, Fatuhada, kinta (02/12).

Maibé hanesan ema militár nia prontu simu liafuan saida de'it hodi aplika tanba nia ema profesionál ida iha Militár nian.

"Hanesan Militár ha'u kumpri orden, maibé nu'udar sidadaun nu'udar ser umanu ha'u laran moras, ha’u la entende liafuan ezonera, ha'u so husu de'it ba sua eselénsia, Señór Ministru, Konsellu Ministru atubele esplika ba públiku Timor-Leste kona-ba liafuan ida ne'e”, afirma nia.

Tanba liafuan ezonerasaun ne'e refere ba Xefe Estadu Maior Forsa Armadas (XEMFA) Brigadeiru Jenerál Calisto dos Santos nia personalidade.

"Ha'u mós la hatene, maluk balun agora iha estranjeiru husu ha'u dehan, Ei Coliate o halo saida mak derepente ema ezonera o?”, haktuir nia.

Calisto dos Santos hanesan Militár ida ne'ebé mak durante ne'e tuir formasaun militár nian husi nível ofisiál to'o Jenerál, iha Austrália, Amérika, Malázsia, no Indonézia.

Desizaun Governu nian ne'ebé mak deside Coliate prontu simu maibé Governu presiza esplika ba públiku Timor-Leste kona-ba termo ka liafuan ezonerasaun ne'ebé mak Governu deside liuhusi proposta deliberasaun iha Konsellu Ministru Kuarta (01/12). (*)