Komadante PNTL Munisípiu Baukau, Superintendente Xefe Armando Monteiro hatete, loron 22 fulan-novembru tinan-2021 lansa parada promosaun ba membru na'in-7 husi postu ajensia sa'e ba ajente prinsipál.
"Ohin parada promosaun ba aktividade ita nia ajensia na'in-7 ne'ebé tempu ona hetan rekuiñesementu no apresiasaun durante hala'o kna'ar liuhusi parada ida ne'e husi postu ajensi sa'e ba ajente prinsipál", dehan nia, segunda (22/11).
Nia afirma, promove membru na'in-7, tanba haree ba dedikasaun servisu durante tinan-6 nia laran livre husi prosesu krime no mós ba disiplinár, nune’e merese duni atu hetan.
Armando fó hanoin ba ajente na'in-7 atu responsabilidade ba kna'ar hodi sai nafatin servidór di'ak ba povu no nasaun ida ne'e.
"Labele kontente no orgullu buat ne'ebé simu, maibé esforsu aan aprende nafatin no mantein disipliña evita hahalok ne'ebé prezudika ita nia kna'ar", armando hatete
Alende ne'e, PNTL mós sei promove Inspektúr balun ne’ebé dadaun tuir hela formasaun iha rairobo iha loron aniversáriu PNTL nian.
Entertantu, membru na'in-7 ne'ebé promovidus kompostu husi Eskuadra na'in-3, seksaun forsa rejerva na’in-3 no ida iha parte administrasaun. (*)
