"Ami husu Xefe Estadu Maiór Generál FALINTIL Forsa Defeza Timor- Leste (F-FDTL), Tenente Jenerál Lere Anan Timur atu foti asaun imediatu ba aktu iregularidade no non-profisionalizmu iha prosesu Rekrutamentu membru foun F-FDTL tinan 2021”, hatete Portavoz Julio da Silva Sarmento liuhusi iha Jardin 5 de Maio, segunda (27/09).
Jerasaun Martiris no Antigos Conbatentes da Libertasaun Nasional husi "Kaixa Komando 05, observa no haree ba prosesu Rekrutamentu iha Komisaun la dun fó inparsialidade ba Joventude sira ne’ebé mak kompete iha prosesu Rekrutamentu Membru foun F-FDTL.
Tanba ne'e husu mós Prezidente Republika (PR), Francisco Guterres ‘Lú Olo’, no Parlamentu Nasionál, liliu Komisaun (B) ne’ebé trata asuntu 'Seguransa e Defeza' atu foti asaun imediatu hasoru Komisaun Rekrutamentu Membru foun F-FDTL tinan 2021, hodi hatur sistema rekrutamentu tuir prosedimentu legál.
"Husu mós Eselençia Primeiru Ministru, Senór Taur Matan Ruak, atu fó mós hanoin ba komisaun rekrutamentu membru foun F-FDTL tinan 2021 hodi hadia sistema rekrutamentu ba futuru”, hatete nia.
Husu mós ba Ministru dos Antigos Conbatenti da Libertasaun Nasional (MACLN), Julio Sarmento da Costa "Meta Mali', atu haree ba problema ne'ebé mensiona iha leten no tenke solusiona ho seriu.
"Ikus liu, ami Jerasaun Martiris no Antigos Conbatentes da Libertasaun Nasional sira husi "Kaixa Komando 03, Hudi Laran, Manieuana, Dili, husu ba Xefe Estadu Maiór FALINTIL Forsa Defeza Timor-Leste (F-FDTL), atu konsidera ami-nia preokupasaun iha leten no hatur as integridade no dignidade institusional Forsa Defeza Timor-Leste (F-FDTL) hodi bele fó valór ba Martiris no funu nain sira nia sakrifisiu”, dehan nia. (*)
