Sidadaun hirak ne'e, PNTL kaptura ina tuku 2 madrugada, tanba deskonfia sira hala'o hela atividade rituál Grupu Arte Marsiál (GAM) nian iha área Manleuana.

Sidadaun sira ne'e, kompostu husi feto na'in-13, mane na’in-102, inklui labarik feto ho minoridade na'in-ida.

Tuir informasaun ne'ebé www.tempotimor.com hetan katak, sidadaun hirak ne'e, ekipa konjunta serku dezde horikalan, no to'o iha kuarta (08/09), maizumenus tuku 2 madru, ekipa kaptura sira no iha tuku 6 dader hafoin transporta ba komandu Dili.

Iha atividade operasau ne’e, PNTL mós halo aprensaun ba evidénsia sira hanesan, motorizada ho marka Vixon 3, Beat 3, Mega Pro 1, no Kawasaki 1.

Dadaun ne'e, ekipa komandu PNTL Munisípiu Dili, halo hela identifikasaun ba sidadaun sira ne'e, hafoin kontinua submete ba prosesu investigasaun.

Maske seidauk iha informasaun ofisiál ruma husi Komandu PNTL Munisípiu, Superintendente Henriques da Costa, maibé durante prosesu identifikasaun, sidadaun sira ne'e deklara ba ekipa identifikasaun katak, sira mai husi GAM.

Observasaun seluk ne'ebé www.tempotimor.com nota katak, oras ne'e mós ekipa sira husi Ministériu Saúde (MS) liuhusi Sala Situasaun Sentru Integradu Jestaun Krize (SS-SIJK), to'o ona iha komandu Dili hodi hala'o "swab test" ba sidadaun sira ne'ebé kapturadu.

Ekipa konjunta sira ne'ebé hala'o atividade operasaun hodi kaptura sidadaun hirak ne'e, mai husi Komandu PNTL ho Falintil-FDTL. (*)