“Ohin ita-nia investigadór Migrasaun nian halo tan identifikasaun ba sidadaun timoroan na’in-84 husi ne’ebé antes ne’e autoridade Seguransa Indonézia deporta fila hikas mai ita-nia rai tanba hakat fronteira terrestre liu dalan ilegál bá Atambua, hodi partisipa seremónia graduasaun hasa’e sintu PSHT (Persaudaraan Setia Hati Terate) iha Indonézia”, dehan Komandante Sektór Operasaun, Servisu Migrasaun, Inspetur Luis do Carmo, ne'ebé www.tempotimor.com asesu, domingu (05/09).
Hafoin deporta husi Autoridade Seguransa Indonézia ba Polísia Nasionál Timor Leste (PNTL) liliu Unidade Polísia Fronteira entrega membru sira ne'e ba ekipa Covid-19 no kumpri kuarantena durante loron 14 iha Díli.
"Sidadaun hirak ita ba foti iha fatin tolu mak hanesan INAP-akomoro iha ema nia’n-53, Ótel Funan Buras ema na’in-18 no Ótel Luz Clarita ema na’in-13 no sira kompleta no kumpri ona kuarentena durante loron 14 nia laran”, esplika nia:
Ba ekipa investigadór husi Migrasaun wainhira remata prosesu identifikasaun sei entrega fali sidadaun hirak ne’e ba Servisu Investigasaun Kriminál Nasionál (SIKN) hodi kontinua halo investigasaun ba prosesu kriminál nian no sei haruka ba Ministériu Públiku hodi prosesa tuir lei. (*)