“Ha’u husu ba organizasaun hothotu sai parseiru ba ita-nia governu, sai parseiru ba dezenvolvimentu, tanba dezenvolvimentu presiza pás no estabilidade, ami lakohi loroloron rona PSHT, Kera Sakti ho organizasaun seluk oho no baku malu ita haree hanesan balada fuik laiha moral”, dehan Lere Anan Timur iha salaun Timor Lodge Kampung Baru-Komoro, sábadu (31/07).

Tanba ne’e ba arte marsiál hothotu tenke sai amigu di’ak ho estadu hodi hakaruk ba lei ne’ebé estabelese iha nasaun ne’e atu nune’e bele dezenvolve di’ak ka lori nasaun ba futuru ne’ebé di’ak liután.

Maske organizasaun arte marsiál sira iha ninia orijen ne’ebé la hanesan, maibé labele despreza no tenke respeitu malu hodi kontribui estabilidade iha Rai laran.

“Maski arte marsiál refere mai husi nasaun seluk la’ós orijen rai ne’e nian maibé ita labele despreza, nafatin respeita maibé tenke utiliza ba dalan di’ak tuir doutrina organizasaun ne’e nian”, hatete nia.

Organizasaun Arte marsiál Persaudaraan Setia Hati Terate (PSHT) no sira seluk tenke hakruuk ba lei ne’ebé eziste iha nasaun Timor-Leste, atu nune’e labele halo traisaun fali ba nasaun hodi ba jura fali ba bandeira husi nasaun seluk. (*)