"Kapelaun, ha’u hanoin ida ne'e ita hotu nian, ita-nia uma mak ne'e, ita-nia uma lisan mak ne'e, ne’ebé iha ne'e ita haree ne'e. Mana hanesan Zeladora, (Katekista) lalika laran susar eh, ne'e ita hotu ita-nian”, dehan nia hafoin hala'o dilogu ho Komunidade iha Área Beduku Suku Tibar, sesta (30/07).

Bainhira, mapa ne’ebé tékniku no dezenadór sira halo, mosu duvida ruma kona-ba igreja ou edifísiu, estadu prontu muda, maibé iha mapa nia laran ne'e iha ona igreja ne’ebé sei hari’i hotu iha bairu Beduku.

"Tanba ida ne'e mak hanesan liuhusi sorumutu ida ne'e hanesan ita-nia autoridade sira ko’alia ona, ho laran malirin, ita ko’alia ita-nia diretu, diretu hotu ne'e hakerek hotu iha lei”, dehan nia.

Husu Komunidade hotu atu fó liman ba malu, oinsá kria kondisaun ida ne’ebé estavel ba membru F-FDTL, tanba bainhira militar sira mak hari’i iha Bairu Beduku, mak inan-aman ne’ebé hala'o negósiu, fa’an modo tahan sira ne'e sei folin.

“Dala ruma tia ho tiu sira, imi-nia modo tahan oan ruma, imi-nia aidila oan ruma ne'e sei folin”, dehan nia.

Reprezentante Kapelaun Beduku, Domingas Oqui, husu ba parte teras propriedade atu haree kestaun kona-ba Kapelaun.

Bainhira família sira mak koopera hamutuk ho estadu, hodi entrega rai ba instituisaun F-FDTL, entaun oinsá ho Bairu Beduku ninia uma Kapelaun.

"Oinsá ho kapela Beduku, tanba kapela mós sei sai, ne’ebé ha’u husu ida ne'e, karik kapela ne'e sai, ami husu ba ita-boot sira bele halo filafali kapela ida ba srani Beduku. Ita-boot sira mak halo, hodi entrega mai ami, tanba ami-nia kapela ne'e kondisaun di’ak hela”, dehan nia.

Iha fatin hanesan Komunidade, Lusia Da Silva, husu ba governu atu esolika kestaun indeminizasaun ba komunidade afetadu sira, tanba sira lakon ai-horis, no hahan agrikultór nian, liliu uma no fatin.

Entrentantu, Komunidade Alfredo de Carvalho, husu Sekretáriu Estadu Terra Propriedade (SETP) no Ministériu Justisa (MJ) inklui parte Advogadu atu labele halo deskriminasaun ka uza forsa hodi ameasa komunidade sira. (*)