“Primeiru kona-ba reabilitasaun ka kampu aviasaun Baukau, preokupasaun povu nian, kona-ba reabilitasaun aviasaun sivíl mais realidade Militar mak mai halo reabilitasaun fali. Ne'ebé ami lori hela povu nia aspirasaun tanba povu trauma”, deklara nia hafoin hasoru malu ho Prezidente Komisaun B trata asuntu Defeza no Seguransa iha Parlamentu Nasionál (PN), kuarta (28/07).
Maske desde uluk to'o agora, Timor-Leste seidauk sai inimigu ho nasaun Estadu Unidu Amerika inklui nasaun sira seluk, tanba Timor-Leste iha hela prinsipiu ida ‘Não Alinado e Amante da Pas’, maibé ho desizaun reabilitasaun kampu aviasun sivél ne'ebe Militar EUA lidera ne'e halo povu Baukau sente deskonfia maka’as.
“Mais iha realidade ita hotu akompaña katak kampu aviasaun, ne'e reabilitasaun ba aviasaun sivíl mais realidade halo reabilitasaun mai fali Militar, ne'e mak ita deskonfia keta iha interese ne'ebé mak bele subar iha laran”, dehan nia.
Ho ida ne'e, UNIJMA deside hasoru malu ho Komisaun B PN trata asuntu defeza no seguransa atubele haruka ba Parlamentu Nasionál nune'e kria lei hodi regula nota intendimentu ne'ebé Estadu Unidu Amerika halo ho Governu Timor-Leste kona-ba reabilitasun kampu aviasaun Baukau.
“Depois segundu kona-ba nota intendimentu ne'e ita-nia governu ho Amerikanu halo tiha ona entaun presiza ita-nia parlamentu ne'e tenke halo lei ida para asegura”, hatete nia.
Ba kestaun ne'e Prezidente Komisaun B, deputadu José Agustinho Siqueira ‘Somotxo’ promete, sei hato'o ejizénsia ne'e ba plenária Parlamentu Nasionál, atu oinsá bele buka solusaun hodi halo regulamentu kona-ba reabilitasaun aviasaun Baukau. (*)