“Ami aproveita oportunidade ida ne'e hodi sujere ba oitavu governu konstituisionál, espesialmente ba Ministériu Interior, nune'e bele fera ulun, oinsa halo reforma ita-nia Polisia Nasionál Timor-Leste (PNTL), liuhusi formasaun kona-ba sistema hotu ne'ebé vigora iha ita-nia rai”, hatete nia iha plenária PN, tersa (27/07).
Haree ba serbisu membru PNTL ne'ebé hala'o durante iha aplikasaun estadu emerjénsia nia laran, nota ajende polísia balun halo atendimentu ba sosiedade liliu membru orgaun soberanu sira la kualidade no la profisionál.
Tanba orgaun soberanu sira-nia karreta la'o, dalaruma balun sira autoriza halai liu de'it, maibé balun ajente sira haruka para hodi husu la ho étika.
“Mai dehan para lai, depois mai dere vidru haruka hatun, depois husu hanesan ne'e (Ba ne'ebé) ita-boot (ajente) sira disiplina iha ne'ebé, ita-boot sira lahatene katak liliu membru Parlamentu ne'e nia livre tránzitu, se lakoi halo liu entaun hasai tiha buat ida tránzitu ne'e”, dehan nia.
Tuir lolos, membru polísia sira tenke husik membru PN ne'e la'o livre, atu nune'e sira bele haree, observa, no bele halo atendimentu ba populasaun, tanba sira mak reprezentante povu nian.
Ho ida ne'e, husu ba Ministériu Interior atubele fó formasaun ba membru sira, espesialmente kona-ba, Konstituisaun RDTL, diretu umanu, espíritu nasionalizmu, relijiaun, e kompleta liu mak tenke haklean iha área étika.
“Ha’u foti ezemplu simples, PNTL, bele forma ninia membru sira hodi bele atende sosiedade no públiku ho kualidade no profisionál”, afirma nia. (*)