Tanba atividade pasa revista ne'ebé hala’o iha semana kotuk, konsege prende transporte hamutuk 138.

“Iha mós ita prende evidénsia hanesan infrasaun. Iha semana ida nia laran, ita konsege prende infratór sira nia evidénsia hamutuk 138. Transporte sira ne'ebé mak komete iha infrasaun ne'e, ita prende hamutuk 138. Ita mós rekolla osan ba kofre du estadu semana ida U$4,497, iha diferente ho semana ida liu ba”, informa Komandante Tránzitu Munisípiu Dili, Inspetór Polísia, Domingos Sarmento Gama, iha kna’ar fatin Kaikoli, segunda (19/07).

Iha semana kotuk, PNTL Dili mós rejísta kazu asidente, hamutuk 12, kanek todan na'in-1, kanek kamaan 12, maibé iha kazu 6 mak parte família entre suspeitu ho vítima sira hakarak rezolve tuir dalan família.

“Iha kazu 6 mak ita sei pendente hela, hein prosesu ba oin, nia kontinuasaun. Ida ne'e ba semana kotuk foin lalais ne'e, hahú iha segunda to'o sábadu”, esplika nia.

Husi transporte hirak ne'ebé PNTL prende, iha motorizada hamutuk 101, karreta 10, motorizada ho marka governu (G) 3, durante iha semana ida nia laran.

Komparasaun taxa Euro 2020 iha fulan-juñu kotuk, infratór sira selu multa hamutuk US$23,529 neebé Polísia hatama ona ba iha kofre estadu.

“Ita haree ba númeru infrasaun ne'e sa'e maka’as, parte polísia tránzitu, seguransa rodaviáriu, ita nafatin apelu ba ita-nia komunidade sira, bainhira la'o iha estrada públiku, primeiru-estár mak ita tenke kuidadu, katak prevene di'ak liu, do que sai vítima”, hatete nia.

Entretantu, kna'ar diáriu polísia tránzitu nian halo iha terrenu, bazeia ba lei kódigu estrada, númeru 06/2003, hodi halo pasa revista ba motorista sira ne'ebé kondúz transporte iha estrada públiku. (*)