Husi insidente ne'e, rezulta Ajende Polísia Nasionál Timor-Leste (PNTL) ida, hetan baku husi grupu balu, inklui tuda rahun karreta privádu ida ho xapa matrikula 11.039.
“Iha domingu dadersan, tuku 02:56 oras madrugrada, iha mós ema asaltu malu iha Bar Timor Top iha área Branka, ne'ebé rezulta PNTL ida ema baku. Depois liu fali minitu balu, iha karreta ida ho xapa matrikula 11.039 hetan estragu ema sira ne'ebé mak asalta iha Timor Top, hodi hein malu iha Metiaut hodi asalta fali karreta ida ne'e, ne'e mak rezulta karreta ne'e nia vidru rahun, e estragu ba karreta ida ne'e”, Portavóz Komandu Jerál PNTL, Superintendente Arnaldo de Araújo, iha Kaikoli, segunda (19/07).
Maibé, hafoin akontesimentu, suspeitu sira halai lakon, no parte PNTL sei buka tuir hela autór sira hodi submete ba prosesu investigasaun.
“Tuir informasaun, momentu ne'e, nia (ajente PNTL) iha duni ne'ebá, maibé agora dadauk sei iha hela prosesu de investigasaun, hotu tiha mak foin bele hatete katak, nia partisipa iha festa ka, ou nia hala'o nia servisu ka, depois de ida ne'e mak ita foin bele hatene. Kronolójia akontesimentu ne’e tanba iha festa ne'ebá, otomatikamente mosu problema, ne'e mak mosu problema iha ne'ebá hodi sira baku malu iha ne’ebá, hodi polísia ne'e hetan kanek. Maibé, nia kronolójia loloos ita seidauk hatene, liuhusi prosesi investigasaun ba mak ita foin bele hatene, tanba saida”, haktenik nia. (*)