Tanba durante ne'e, komandu PNTL Munisípiu sira iha eskudra barak mak karreta avaria totál to'o difikulta sira labele halo operasaun.  

"Purtantu, ha'u ho komandante jerál mós ko’alia ona katak, sé ita iha karreta nune'e de'it, ha'u hanoin problema oitoan ba ita-nia eleisaun tinan oin, e ha'u sempre ezíje komandante jerál, ha'u dehan, lahatene ita ba haree took meius saida para ita bele ajuda tan Munisípiu ho unidade sira. Tanba ita kálkula de'it, ita iha postu 65, purtantu, ita presiza karreta pelu-menus postu ida, eskuadra ida, iha ida. Ida ne'e ita-nia tarjetu molok atu tama ba kampaña tinan oin, ita dezenraska para tenke hetan”, hatete Vise Ministru Interior (MI), António Armindo, iha kuartel jerál PNTL Kaikoli, tersa (06/07).

Karreta hirak ne'ebé dadauk iha, seidauk sufisiente ba membru PNTL sira atu halo servisu ba operasaun nian, maske fó ona, maibé governu sei kontinua para halo atu nune’e bele sosa tan karreta hodi fahe ba eskuadra sira halo kompleta molok hasoru eleisaun tinan 2022.

"Ha'u fiar, ita optimista para bele uza maneiras halo nusá para bele hetan apoiu. Sé orsamentu tinan ne'e liu tiha ona, purtantu, ha'u ho komandante jerál, husu buka tun sa'e, para pelu-menus iha netik rúbrika ruma ne'ebé mak ita husik hela ba tinan ne'e”, afirma  nia.

Maske nune'e, kontinua husu ba komandante kada Munisípiu sira atu orienta membru utiliza karreta ho kuidadu, tanba uza osan povu nian.

Tuir aprovasaun Primeiru Ministru (PM), Taur Matan Ruak, ne'ebé hanesan Ministru Interior katak, karreta ne'ebé distribui ona, labele troka, maibé tenke uza tuir regra.

"Ita la'o sees husi ne'e, ha'u hatene komandante sira mak mai simu, mais ba Munisípiu labele troka fali. Sé troka fali, hatene ona ne'e dezobediénsia ba ordén ona, purtantu ita halo tuir de'it”, informa nia.(*)