"En-nome Polísia Nasional Timor-Leste, ami agradese teb-tebes, tanba ita hakarak atu dezenvolve instuisaun, importante liu mak oinsá profisionaliza e moderna PNTL. Ida ne'e mak prinsipal liu”, hatete Segundu Komandante PNTL, Komisáriu, Mateus Fernandes iha inaugurasaun sentru tátika iha baze UEP Bairopite, tersa (06/07).

Durante ne'e ema hotu akompaña kona-ba krítika sira husi públiku, ligadu ba atitude husi membru PNTL balu, dala-ruma mós tanba seidauk profisionaliza nomós la moderna iha ekipamentu sira inklui infraestrutura bázika iha PNTL nian.

"Oinsá ida mak ita profisionaliza polísia, oinsá ida moderniza polísia. Asuntu boot rua ne'e mak, oinsá mak ita bele hetan?. Ohin, ami sente katak, kontente teb-tebes, tanba liuhusi parseiru TLPDP bele ajuda halo fatin treinamentu tátiku ba unidade espesiál, para oinsá mak mai oin bele mellora liután sira-nia kapasidade, oinsá bele atua situasaun iha kampu”, afirma nia.

Entrentantu Vise Ministru Interior (MI), António Armindo hatete, iha tinan 2022, Instituisaun PNTL hamutuk ho Ministériu Interior sei tau osan, oinsá bele hadi’a kualidade ekipamentu servisu ba membru sira, tanba ekipamentu sira ne'ebé dadaun ne'e membru sira uza, balu tuan ona.

"Hanesan ita haree, governu mós haree limitasaun sira nee, e governu mós prekupasaun kona-ba limitasaun sira ne'e, para oinsá bele ajuda hadi'a, mellora sira nia difikuldade sira ne'e. Tinan oin, ita komesa ona hanoin, para tenke mellora sira-nia ekipamemtu haree atu tau matan ba sira”,  dehan nia.

Ba sentru treinamentu tátika ba UEP ne'e rasik, konstrui husi kompaña Caltech General Contracting, ho durasaun tempu fulan tolu, ne’ebé kompleta ho kuartu tátiku 10, tanba hetan apoiu finanseiru husi TLPDP ho valór orsamentu hamutuk rihun US$117. (*)