“Komandante distritu Dili, koordena ho saúde munisipiu Dili no saúde PNTL para atu bele halo sensibilizasaun ba membru sira ne'ebé mak seidauk vasina, atu bele esplika ba sira, oinsá para lala'ok vasina ninian, tanba ami mak liña frente”, informa Segundu Komandante Munisípiu Dili, Superintendente Polísia, João Sancho Pires, iha Salaun Komandu Dili, iha Kaikoli, segunda (05/07).
Tanba sensibilizasaun ne'e atu esplika ba membru sira hodi bele komprende didi'ak, atubele tuir vasina, maibé balu ne'ebé mak sente iha moras ruma, bele informa ba médiku sira, nune'e labele prejudika ba sira-nia saúde.
“Ita haruka sira katak rona lai esplikasaun doutór sira-nian, para hodi nune'e sira bele envolve sira-nia an iha vasina ida ne'e”, afirma nia.
Ba membru sira ne'ebé laiha moras ruma, tenke simu vasina hodi nune'e bele fó seguransa ba komunidade sira, tanba PNTL mak instituisaun ida ne'ebé besik liu povu no sai hanesan liña frente.
“Ami sai liña frente, hasoru ema barbarak iha terrenu ne'ebá, hakarak ka lakohi ita mós tenke asegura uluk ita-nia an, tanba ne'e mak ita bolu doutór sira mai atubele esplika hela, sensibilizsaun ne'e importante atu membru sira bele hatene, hodi nune'e sira ne'ebé mak seidauk karik bele tuir vasina”, hatete nia.
Komandu PNTL la obriga membru sira atu simu vasina, maibé hala'o sensibilizasaun atu nune'e membru sira bele partisipa iha vasina hodi aumenta imunidade iha luta hasoru pandemia globál Covid-19 iha Timor-Leste.
Tuir dadus, membru PNTL sira iha munisípiu Dili hamutuk ema na-in-atus-lima-resin, barak partisipa ona programa nasionál vasina Covid-19 nia. (*)