Motorizada hirak ne'e PNTL prende liuhusi pasa reviata iha semana kotuk, hahú husi loron 19 to'o 25 fulan-juñu tinan 2021, bainhira komunidade sira ne’ebé komboiu iha kapitál Dili hodi asiste jogu kopa Euro 2020.

“Iha semana kotuk iha dia 19 até 25, ita konsege prende transporte komunidade nian hamutuk 289, e totál nia orsamentu ita hatama ba kofre estadu, semana kotuk nian, hamutuk US$9,102 ba kofre estadu”, dehan Komandante Tránzitu Munisípiu Dili, Inspetór Polísia, Domingos Sarmento Gama, iha kna'ar fatin Kaikoli, kuarta (30/06).

Infrasaun hirak ne'ebé motorista sira komete mak la uza kapasete, laiha dokumentu, uza kanu-resin, no balu mós laiha karta kondusaun.

“Tanba ne'e mak preukupa tebes karta kondusaun laiha, seluk laiha xapa matrikula, ida ne'e gráve, tanba iha kapitál Dili iha grupu balu mak uza motorizada laiha xapa matrikula hodi hadau ema nia sasán nomós halo krime hasoru ema seluk”, hatete nia.

Aleinde ne'e, PNTL rejista mós kazu insidente hamutuk 20, ida mak fatál (mate) tanba hetan soke husi motorista ida iha área Kuluhun.

Entretantu, iha tersa (29/06), PNTL mós prende motorizada hamutuk 157, no dadaun ne'e membru tránzitu sira prepara hela nota infrasaun ba motorista hodi ba selu iha banku, hafoin bele foti fila transporte.

“Iha atividade pasa revista orseik (tersa, 29/06) lokraik to'o kalan, ita konsege prende motorizada hamutuk 157, agora dadauk la'o hela prosesu, ita-nia komunidade sira antrian hamriik hela simu nota infrasaun hodi ba selu iha banku”, dehan nia. (*)