“Labele kondena de'it sira ne'ebé ba sorin, katak sira ruanulu, tolunulu nusa mak la bele deteta, ne'e siknifika iha ema balun fasilita, entaun aperta ema ne'ebé ilegál, nune'e denunsia se mak fasilita sira, polísia ka F-FDTL ou populasaun, kriminiza hotu selae ita halimar ho buat sira ne'e”, dehan Lere hafoin sorumutu ho Prezidente Repúblika, Francisco Guterres 'Lú Olo', iha palásiu prezidensiál Bairroite, kuarta (30/06).

Iha sorumutu ho Prezidente Repúblika hodi ko'alia kona-ba seguransa iha fronteira nian tanba dadaun ne'e iha informasaun barak liliu kona-ba arte marsiál ne'ebé balun iha Atambua-Indonézia.

“Labele ema ilegál mai, ita hatama kuarentena, estadu selu tan nia hán, selu tan nia otél e husik filafali, depois nia ba fali mai kaer fali, ida ne'e labele akontese no ami sei reforsa seguransa nian, nune'e justisa mós tenke kooperasaun ho ami atu fó motivasaun tanba buat ne'e la halimar”, afirma nia.

Tanba ne’e husu ba Grupu Arte Marsiál sira atubele hakmate iha fatin hodi kontribui ba estabilidade rai laran no kumpri regra ne’ebé fó sai husi Governu ba prevensaun moras Covid-19. 

“Alin sira arte marsiál labele buza demais ita nu'udar Timoroan ita hakarak hothotu koopera ba estabilidade nasaun ninian, koopera ba planu Ministériu Saúde nian, nune'e ita-nia komunidade la bele hetan moras por que ita uluk dehan katak corona mosu ne'e la'ós hetan iha Timor ne'e, sira iha sorin mak lori mai, ita lakoi variante foun ne'e lori tan mai iha ne'e”, deklara nia. (*)