“Prosesu ida ne'e, submete ona prosesu identifikasaun, espera katak husi parte servisu investigasaun, komunika ba ministériu públiku, medida ida ne'ebé mak tuir prosedimentu legál ne'e medida saida aplika ba sira, sira na'in sei simu konsekuénsia”, dehan Segundu Komandante PNTL munisípiu Dili, Superintendente Polísia, Euclides da Costa Belo, iha Kaikoli, tersa (29/06).

Tanba ne’e, husu ba sidadaun ne'ebé hela iha kapitál no husi munisípiu bainhira halo viájen tenke lori kartaun vasina Covid-19 nian.

“Husu para kumpri nafatin regra, labele lori ema seluk nia kartaun para viola regra, bainhira falsifika, kríme. Kríme sei hasai ba ita-boot sira. Tanba ne'e mak husu ba ita-boot sira labele koko, tanba ajente PNTL loron ba loron, fulan to'o tinan, aumenta nia kapasidade atu deteta. Sé mak bosok, sé mak la bosok, e ida bosok ne'e perigu ba nia-an rasik, mais ida la bosok ne'e agradese tanba nia bele kontribui ba prosedimentu legál ne'ebá mak estabelese”, afirma nia.

Ba sidadaun mane na'in-tolu ne'e, tuir planu halo viájen ba munisípiu Bobonoru, maibé tanba utilza fali família seluk nia kartaun Vasina Covid-19, ikus mai membru PNTL sira tenke kaptura no halo keda detensaun iha Sela Komandu Munisípiu Dili.

Maske nune’e Komandu Munisípiu Dili seidauk bele fó sai identidade husi sidadaun hirak ne'e, no oinsá motivu husi aktu ne'ebé sira komete, tanba sei halo hela prosesu identifikasaun no investigasaun ba suspeitu sira, hafoin pronúnsia rezultadu finál.

Entretantu, sidadaun na'in-tolu ne'e, membru PNTL sira kaptura iha loron segunda (28/06), maizumenus tuku 10:35 dadeer, iha Postu Seguransa Polísia Tasitolu. (*)