“Husu ba ita-nia transporte públiku sira, mikrolete, Taxi, ho Biskota sira ne'ebé mak halo operasoens iha kapitál Dili, favor ida, ita-nia diresaun nasionál transporte terrestre loke fali ona, sira aproveita dokumentu balu mak laiha, balu mak liu ona prazu, favor ida ba renova fali”, dehan Komandante Tránzitu Munisípiu Dili, Inspetór Polísia, Domingos Sarmento Gama, iha Kaikoli, tersa (22/06).
Bainhira motorista la renova sira-nia dokumentu motorizada ho karreta ne'ebé mate ka balu liu ona prazu, PNTL sei foti medida tuir lei hasoru sidadaun sira hodi aplika multa.
Tanba ne'e, husu ba motorista sira labele ho razaun oioin atu konvense fali membru PNTL sira iha estrada públiku, tanba edifísiu instutuisaun estadu sira iha kapitál Dili, maioria mak loke filafali ona.
“Sé sira la renova mak semana ka fulan tuir mai sei aplika multa ba sira. Laiha razaun para ita atu konvense parte tránzitu. Tan ida ne'e ita hakarak husu ba ita-nia komunidade sira, dokumentu mak liu ona prazu, favor renova fali. Karik sira-nia Xapa matrikula mak la kompletu, favor ba trata para halo kompleta Xapa matríkula”, haktenik nia.
Entretantu, tuir dadus, durante asiste jogu Kopa Euro, PNTL,munisípiu Dili, liuhusi unidade tránzitu, prende motorizada hamutuk 146, tanba viola infrasaun lei kódigu estrada, laiha dokumentu transporte no Xapa matríkula, inklui laiha karta kondusaun. (*)
