"Ha'u ho komandante PNTL nian sei tuur hamutuk hodi atua situasaun ne'e, ita lalika tolera artemarsiais kiik ukun fali Timor, tenke estadu mak ukun Timor, estadu dehan katak monopoliu da violensia. Estadu mak uza forsa, uza violensia mais kualker ema labele uza. Tanba ne'e artemarsiais labele uza violensia hakotu ema nia vida," dehan Lere relasiona ho konfrontu entre grupu artemarsiais iha Leorema, Bazartete, Munisipiu Likisa ne’ebé hamate ema na’in rua.

Tuir Lere, desizaun governu hodi bandu artemarsiais sira labele halo atividade tanba hakarak atu povu Timor Leste moris hakmatek.

Maibé, Lere dehan, ho situasaun ne’ebé daudauk ne’e mosu, komponente hotu-hotu tenke serbisu hamutuk hodi bele atua.

"Husi governu, PNTL, F-FDTL, Tribunal tenke serbisu hamutuk, se lae Polisia ba kaer, tribunal husik mós hanesan de'it," dehan Lere hafoin hasoru-malu ho Prezidente Repúblika Francisco Guterres Lu Olo iha palásiu prezidensial, Bairro-pite, Kuarta (10/07).

Maijor Jeneral Lere dehan, iha enkontru ho PR Lu Olo no Xefe Kaza Militar, koalia mós kona-ba situasaun artemarsiais sira.

"Ohin ha'u ho PR no Xefe Kaza Militar ami ko'alia uitoan kona-ba ida ne'e, liu-liu situasaun ne'ebé la'o dadaun,” Lere informa.

Maske koalia maka’as hasoru grupu artemarsiais sira, maibé Lere kontinua apela ba membru grupu artemarsiais atu hapara ona asaun krime.

“Agora (membru) artemarsiais ne'e Timor-oan, dala-ruma imi sira ne'e balun uluk terus ba funu ne'e, dala-ruma imi-nia Inan-Aman balun mate ba funu ne'e, entaun hadomi imi-nia rai ba."

Komandante F-FDTL ne’e dehan, se bainhira sente an nu’udar Timor-oan, lalika marka diferensia ho maluk Timor-oan sira seluk.