KSDS Enkontru ho PR Diskuti Ezonera Komandante Komponente F-FDTL Featured

Reuniaun KSDS iha Palasiu Prezidente da Republika Aitarak Laran, Dili (09/07) Reuniaun KSDS iha Palasiu Prezidente da Republika Aitarak Laran, Dili (09/07) Foto Midia PR

Tempotimor (Dili) Konsellu Superior Defeza no Seguransa (KSDS) realiza enkontru ho Prezidente Repúblika Francisco Guturres Lu Olo hodi diskuti kona-ba ezonerasaun no nomeiasaun ba Komandante Komponente sira iha instituisaun FALINTIL Forsa Defeza Timor Leste (F-FDTL).

Liu husi enkontru ne’e, Komando F-FDTL aprezenta lista Komandante Komponente sira ne’ebé ezonera no mós lista Komandante foun ne’ebé atu subtitui.

Tuir lista, Komandante Komponente haat ne’ebé sei ezonera mak Komandante Komponente Terrestre, Komandante Komponente Apoiu Serbisu, Komandante Sentru Formasaun Terenu, no Komandante Komponente Naval.

“Ezonera Komandante Komponente Terrestre, Komandante Rijai, nomeia Tanente Koronel Renilde. Ezonera Komandante Komponente Apoiu Serbisu, Tanente koronel Funu Fanu, nomeia Tanente Koronel Armindo Nunes. Ezonera Tanente Koronel Daileba husi Sentru Formasaun Terenu, nomeia Tanente Koronel Haksolok. Ezonera Komandante Komponente Naval Jeki, nomeia Kapitaun João Silva,” informa Xefe Estadu Maior F-FDTL Maijor Jeneral Lere Anan Timur hafoin enkontru, iha palasiu prezidensial Bairro-pite, Tersa (09/07).

Maijor Jeneral ne’e hatete, Komandante foun sira sei assume sira-nia mandatu durante tinan rua no bele extende ba tinan ida tan.

“Sira ne’e lidera tinan rua-rua de’it, mais ita bele dehan katak tinan rua ne’e la sufisiénte, agora flexibilidade iha Komandu (F-FDTL) nia laran, bele tinan tolu máximu.”

Hatan kona-ba pose ba Komandante foun ne’e, Lere dehan, Prezidente Repúblika iha kompetensia hodi ezonera no nomeia maibé la koalia kona-ba fó pose. PR so fó pose ba Xefe Estadu Maior Jeneral no nia Vise.

Pose ba Komandante Komponente sira, Lere dehan, ne’e nu’udar pasajen ida. Bainhira PR públika ona desizaun iha Jornal Republika, Xefe Estadu Maior Jeneral sei fó pasajen komandu ba komandante sira.

Lere hatete, Komandante Komponente hirak ne’e hetan ezonerasaun la’os tanba la susesu, maibé bazeia ba estatutu F-FDTL nian.

“La’os, la’os tanba la susesu, maibé ne’e propriu ne’e ami-nia estatutu rotatividade ba Komandante Komponentes. Sira ne’ebé hetan ezonerasaun ne’e hala’o fali serbisu seluk ne’ebé iha instituisaun militar nian,” dehan nia,

Rate this item
(0 votes)
Last modified on Tuesday, 09 July 2019 20:40
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com