Polisia Ida Hetan Ta’a, Ministru Paixão: Tempu Ona Tuur Hanoin Featured

PNTL sira marca hela PNTL sira marca hela Foto Suplai, Lirio ba Tempo Semanal

Tempotimor (Dili) - Iha Tersa (11/06) kalan, ema dezkoñesidu ta’a kanek ajente polisia Inacio dos Santos iha eskola 30 Agostu nia oin. Ba kazu ne’e, Ministru Defeza no Seguransa Filomeno Paixão husu ba ajente polisia hotu-hotu atu hahú hanoin tanba sa polisia mak sai alvu.

Tuir Ministru ne’e, asaun krime balun ne’ebé mosu dala-ruma provoka mós husi ema-nia hahalok no envolvimentu ne’ebé sees husi ninia knar.

"Iha ne'e aproveita, ha'u la apelu, mais ezije ba Polísia Nasional Timor Leste, ajente sira tuur halo de’it mak serbisu lalika ba mete iha artemarsiais, lalika ba tama iha organizasoens ne'ebé ke laos PNTL," dehan Ministru Filomeno ba jornalista sira iha palásiu governu hafoin reuniaun Konsellu Ministru, Kuarta (12/06/2019).

Tuir ministru ne’e, di’ak liu ajente polisia sira hatudu atetude imparsial nune’e bainhira polisia la’o iha komunidade nia leet, iha respeitu husi komunidade.

"Iha mundu iha krime ne'ebé, ida ne'e ba ha'u la'os dehan normal, mais prontu ita bele espera katak sempre bele akontese. Agora nia ba ta’a loos polísia ne'e nak la hatene tanba saida, ne'ebé ha'u bele dehan nia razoens barak, razoens barak mak nia ba buka loos polísia," dehan ministru Filomeno.

Ho kazu ne’e, ministru dehan, PNTL mak tenke tuur hanoin tanba saida mak polísia sai alvu ba buat sira hanesan ne'e.

Entretantu, iha Tersa kalan maizumenus tuku 20.00, membru PNTL Munispiu Bobonaro ida, Inacio dos Santos, hetan ta’a iha kotuk laran husi ema dezkoñesidu bainhira nia mai Dili atu ba haree nia oan ne’ebé baixa iha Ospital Nasionál Guido Valadares (ONGV).

“Iha tempu ami-nia membru ajente polisia Inacio dos Santos mai husi munisipiu Bobonaro atu haree nia oan moras iha ospital, maibé to’o iha parte Komoro nian mak ema dezkoñesidu uza motor ta’a kanek,” informa Komandante Operasaun PNTL, Pedro Belo.

Pedro dehan, hafoin kazu ne’e akontese PNTL bolu ona ema balun hodi fó deklarasaun, no ekipa polisia nian sei kontinua serbisu atu bele deskobre suspeitu.

Rate this item
(1 Vote)
Last modified on Wednesday, 12 June 2019 23:33
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com