Iha enkontru regular ho Prezidente Repúblika, Komandante Jerál Polisia Nasional Timor-Leste (PNTL) relata katak durante semana 2 nia laran hamutuk ema na'in 2 maka mate tanba hetan oho.
"Baukau iha kazu rua. Ida tuda mate no ida fali ema taa to'o mate. Iha Baukau ne'e arte marsiais", dehan Komandante Jeral PNTL, Komisáriu Faustino da Costa, iha Palásiu Prezidensiál, Bairru-Pité, Kinta (30/5).
Nune'e, kazu omisidiu tuda mate iha Baukau prosesu iha ona Ministériu Públiku, polisia hein de'it delegasaun hodi kontinua ninia prosesu.
Kona-ba kazu tentativa omisidiu iha Hotel Timor oin ne'e detéta ona maibé momentu ne'e la'os ho atributu arte marsiais.
Vítima ne'ebé ema taa iha Hotel Timor oin hetan kanek no agora halo hela tratamentu saude. Kondisaun ikus liu komesa rekopera ona.
Iha soru-mutu ho Xefe Estadu hato'o mos kona-ba progresu andamentu ba kazu sira ne'e akontese iha rai-laran.
Faustino dehan, total asidente ne'ebé iha durante semana rua nia-laran rezulta ema hira mak kanek no mate ho ninia kauza saida, sei iha prosesu identifikasaun laran.
Iha parte seluk tuir autoridade judisiariu ida dehan numeru krime iha Timor Leste aumenta ba beibeik kompara ho numeru Juiz ho Prokuradores mak atende kazu sira ne'e.
