Membru Polisia espesial ida ne’ebé husu www.tempotimor.com labele publika nia identidade hateten, iha fulan kotuk iha membru polisia na’in rua mak mate, no husik hela todan ba membru PNTL sira seluk.

Membru Polisia Espesial ho naran Adelino mate iha fulan Outobru no Fransisco Miranda mate iha Novembru 2020, maibé husik hela halerik ne’e ba membru polisia espesial sira seluk hamutuk 700 ne’ebé sei hala’o sira nia kna’ar.

“Ami nia membru servisu to’o mate mas kaixaun oan ida mós laiha. Ministériu Interiór karak kaixaun ba matebian sira”, Membru Polisia espesiál ida hateten ba www.tempotimor.com.

Nune’e mós fontes ida seluk ho naran Ameta la’ós naran loloos hanesan mós membru polisia espesial ida hateten, situasaun ne’e halo sira laran moras ba governante sira tanba, la tau matan ba memrbu sira.

Nune’e, ho inisiativa no solidariedade sira deside hamutuk hodi koa sira nia salariu ema ida $10, ho membru hamutuk na’in 700.

“Hodi ajuda familia no foti instituisaun nia oin kada membru ida ami hotu-hotu kuaze hamutuk 700 pesoas kua $10 hodi sosa kaixaun ba ami nia maluk. Membru barak inklui ha’u la aseita maibe desizaun komandante unidade ne’ebé ami halo tuir deit ona. Ami sente estadu la valoriza ami nia servisu too mate mos kaixaun la sosa ba ami,” Membru polisia espesial ne’e hateten ba www.tempotimor.com iha fatin ida besik Dili.

Nia ezeije ba Komandu PNTL atu tau matan ba kestaun ne’e tanba ida ne’e konsidera hanesan kestasun sériu no presija rezolve.

“Hanesan membru PNTL sente laran triste tamba komandu ejije ami sira ne’e servisu 24 horas maibe too mate deit kaixaun ida mos laiha,” Ameta espresa ho laran triste.

Membru sira husu vise Ministru tenki tau osan rezerva nune’e komandu jeral bele atende situasaun emergensia hanesan ema mate derepenti, hanesan daudaun kolega na’in rua ne’ebé mate ona.

Nia mós informa katak, membru PNTL sira dehan Ministru ho Vise Ministru karak iha desizaun politika hodi fase liman no la valoriza membru PNTL sira nia serbisu ba estadu.

Hatan ba situasaun ne’ebe membru PNTL sira hasoru Vise Ministru Antonio Armindo subar a’an iha abrigu tribunal das kontas nia rekomendasaun.

“Orientasaun PM iha ona katak tuir rekomendasaun tribunal de kontas governu labele ajuda ona kaixaun no seluk tan maibe agora ita orienta komandu para fulan fulan kontribui osan uituan uituan atu membru ruma mate bele responde,” Vise Ministru hateten via Mensajen Whatsapp.

Entretantu, Ministériu Interiór iha tinan 2021 aloka orsamentu ba Polisia Nasionál Timor-Leste (PNTL) hamutuk millaun $38. (*)