Komjer PNTL: "Ermera ne’e Wow Duni”

Reuniaun kuadru superior PNTL nian iha kuartel PNTL Kaikoli Reuniaun kuadru superior PNTL nian iha kuartel PNTL Kaikoli Foto File

Tempotimor (Dili)-Komandante Jeral Polisia Nasionál Timor-Leste Faustino da Costa hatete, kazu ema halai tama ba Aeroportu akontese dala rua ona, no kazu rua ne’e komete husi komunidade Munisipiu Ermera nian. Ermera wow duni.

Iha Tersa (28/07) tuku 7.45 dader, Timor-oan ida ho inisial DM tama ba aeroportu internasional Komoro no halai ba fatin ema sa’e aviaun.

DM ne’ebé ikus mai identifika nu’udar komunidade husi Letefoho, Munisipiu Ermera ne’e, deskonfia sofre moras mental.

"Ema ne'e ita foti ho imediatu, depois ita koordena kedas ho Pradet, keta halo be ida uluk ne'e dehan Aman Maromak mak haruka, agora ida ne'e ba dala rua, Ermera ne'e wow duni. Ida uluk ho motor atu xoke aviaun, Ermera ida foin dadaun ne'e halai tama ba aviaun laran, maibé odamatan aviaun nian taka," dehan Komisáriu Faustino ho hamnasa iha Palásiu Prezidensiál Bairu-pite Dili, Kinta (30/07).

Nia afirma, molok ne’e, iha ona kazu ida ne’ebé mós identifika nu’udar komunidade husi Munisipiu Ermera, no bainhira polisia halo interogasaun, nia hatete katak Aman Laran Luak mak haruka.

"Antes ne'e dehan Aman Laran Luak mak haruka, entaun ami deskonfia ida agora ne'e mak ami kontaktu ona ho Pradet par halo check-up, iha moras mental ruma ka saida, depois mak halo desizaun," nia dehan.

Kona-ba seguransa iha aeroportu, Faustino hatete, fahe ba divizaun ne’ebé kompostu husi: Seguransa Sivil iha parte laran, UPF iha parte li’ur, no migrasaun.

Ho akontesimentu ne’e, Komjer PNTL ne’e dehan, Komando PNTL koordena no orienta mós komandante postu atu bele haree tanba sa mak bele tama ho fasil to’o aeroportu laran.

Rate this item
(1 Vote)
Last modified on Thursday, 30 July 2020 18:17
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.