"Deklarasaun atu hetan kartaun eleitorál ne'e la'ós PNTL, see karik buat ne'e mosu ona sé mak halo deklarasaun atu hetan kartaun eleitorál ne'e, tenke haree ne'e," dehan Komandante Jerál PNTL, Komisariu Faustino da Costa, iha Palásiu Prezidensiál, Bairru-Pité, Kinta (27/2).
Faustino rasik dala-barak hatete ba parte komponente atu tau atensaun ba ema estranjeiru sira ne'ebé iha kartaun eleitorál, PNTL nunka hasai deklarasaun ba ema atu asesu kartaun eleitorál tanba PNTL so atende de'it karta deklarasaun bainhira eleitorál lakon hodi bele prosesa kartaun foun.
Komisáriu ne'e esplika, kuandu iha indikasaun krime polisia sempre prontu atua.
Entertantu, antes ne'e, Diretór Jerál STAE, Edgar Sequeira Martins hatete, iha fulan-Dezembru 2019, STAE rejistu ona eleitór hamutuk 810.077 no husi dadus ne'ebé iha Ministériu Justisa identifika ona sidadaun estranjeiru balun ne'ebé utiliza eleitorál Timor nian.
Nee duni, Sekretariadu Tékniku Administrasaun Eleitorál (STAE) husu atu Polisia Nasionál Timor Leste (PNTL) atu foti medida hasoru ema hirak ne'e.(*)