"Agora dadaun elementu sira postu Hera, Eskuadra Cristo Rei apoiu mós husu Vera-Cruz, Na'in Feto inklui Batallaun Orden Publika (BOP) sei iha ne'ebá halo identifikasaun no suspeitu balun kaptura ona," dehan Komandante PNTL Munisípiu Dili, Superintendente Xefe Armando Monteiro, bawww.tempotimor.com via telemóvel, Kinta (27/2).
Nia dehan, kronolójia akontesimentu mosu asidente singulár ida ne'ebé iha Basecamp Hera, ne'ebá rezulta vítima mate.
Bainhira lori fila ba área Bekora, atu lori fila ba parte leste nian, hetan akompaña husi asaun solidariedade no akompaña mós husi Polisia, maibé to'o iha fatin akontesimentu mosu kedas asaun brutalizmu, nune'e estraga sasán komunidade sira iha estrada ninin.
Kazu ne'e akontese deskonfia envolve husi grupu arte-marsiál, tanba ne'e membru seguransa sira akompaña, maibé labele kontrolu tanba volume massa boot liu.
"Sira-nia númeru ne'ebé barak no balun tenta dezvia husi ita-nia kontrolu no estragu, maibé PNTL rasik prevene no foti medida kedas," tenik Monteiro.
Entertantu, PNTL rasik konsege halo impede movimentu ba ema atus rua resin ne'ebe akompana matebian atu ba Viqueque no "identifika ema na'in 9 mak involve direta ba estragos motor rua no bengkel no restu halo passa rabista no haruka liu hodi fila fali mai Dili."
"suspeitu nain 9 husi Ex. Arte Marsiais IKS no agora sira iha hela sela detensaun," Armando esplika.
"Suspeitu balun mak agora iha ita-nia liman, agora vitima sira mós balun koñese nune'e ita agora identifika atu haree sira-nia lisensa sirkulasaun iha estrada públiku, nune'e akontesimentu ne'e la rezulta ema ruma kanek ka mate," hatete Monteiro.
Komandante PNTL iha kapital nasaun nian ne'e mos informa situasaun iha Dili, maske mosu konfrontus iha fatin balun maibe situasaun kontroladu.
“Horseik mos mosu konfronto estudante iha Comoro, PNTL Kaptura 22 pessoas sei iha sela detensaun no aban (Sexta, 28/2) lori ba submete Primerio Interogatorio iha Tribunal Distrital Dili. Sira hotu mai husi Ex. Arte Marsiais IKS,” relata Armando (*)