Tuir informasaun ne’ebé Tempotimor.com asesu, entre sidadaun Indonezia na’in 10 ne’e, na’in sia (9) seluk hetan kapturasaun bainhira tama iha portu Dili ho intensaun atu foti sasan obralan hodi ba fa’an iha Indonezia. Sidadaun Indonezia ne’e tama la ho dokumentus.

Diretór Jeral Imigrasaun, Superintendente Polisia Augustinho Gomes informa, ninia parte daudauk ne’e prosesa hela sidadaun Indonezia na’in 10 ne’ebé tama illegal mai Timor Leste.

"Agora dadaun sei halo hela prosesu investigasaun, nia prosesu sei final," dehan Augustinho iha nia knar fatin, Edifisiu Ministériu Interior, Kaikoli, Segunda (13/01).

Maske la esplika klaru sidadaun Indonezia hirak ne’e hetan kapturasaun iha ne’ebé no horibainhira, Diretór Jeral ne’e dehan de’it katak sira kaptura sidadaun hirak ne’e tanba tama illegal.

Nia hatete tan, prosesu mak deside sidadaun Indonezia  hirak ne’e lori ba Ministériu Públiku ka prosesa tuir lei imigrasaun nian.

“Nia prosesu ikus konserteza sei haruka fila Sidadaun sira ne'e ba sira-nia raí," dehan Agustinho.

Seguransa Tasi Timor Leste fraku tebes nune'e dala barak ona sempre fo esbasu ba ema halo atividade kontra bandu no pratika peska ilegal.