Portavoz Relasaun Públika Komandu Jerál (PNTL), Superintendente Xefe Armando Monteiro hatete, kazu krime insidente ne’ebé akontese durante fulan-8 nia laran PNTL rejista hamutuk 2.359 mak akonte iha teritóriu Timor-Leste.

Husi kazu krime sira ne’e PNTL rejista iha kazu rua ne’ebé mak akontese sai preokupasaun ba públiku mak hanesan iha loron 16 augustu iha Suai, Debo akontese kazu omesidu agravadu no kazu perturbasaun ordem públiku iha Munisípiu Dili akontese iha loron 19 augustu iha área Tau-Ana Laran ho Timor Lodge Komoro nian.

“Husi kazu krime hamutuk 2.359  hotu ita aprezenta hotu ona ba Ministériu Públiku (MP), mak hanesan na’in ba titular balun hetan ona desizaun husi tribunál”, dehan Armando iha Kuartel Jerál PNTL, Kaikoli, kinta (25/08).

Husi kazu krime hirak ne’e PNTL hanesan autoridade seguransa prontu halo servisu 24 oras atu atende kazu saida de’it mak akontese, tanba ne’e husu ba públiku tomak atu kria nafatin paz ho dame iha sosiadade hodi dezemvolve Timor-Leste ba oin.

Tanba ne’e iha fulan-8 nia laran PNTL rejista kazu krime sira ne’e maioria mak hanesan kazu ofensa Integridade fizika simples, Violénsia Doméstika, Danu ho kazu asaltu malu ho seluk ne’e númeru ki’ik, maibé husu nafatin ba públiku no sosiadade atu kria dame ho hakmatek ema hotu livre halo servisu saida de’it.

“Husi kazu krime sira ne’ebé akontese ho tipu ne’ebé mak aas liu durante iha fulan-8 ita identifika hanesan kazu ofensa Integridade fizika simples, Violénsia Doméstika, Danu ho kazu asaltu malu seluk ne’e númeru ki’ik ida-ne’e mak ita rejista atu informa ba públiku hodi hatene servisu autoridade seguransa iha Timor-Leste”, dehan nia.

Entretantu tuir dadus estatistika ne’ebé www.tempotimor.com asesu ba kazu krime ne’ebé akontese durante fulan-8 nia laran hahú iha fulan-Janeiru akontete kazu krime 324, Fevereiru 241, Marsu 270, Abril 327, Maiu 326, Juñu 295, Jullu 344 no Agostu 232 ho totál hamutuk mak 2.359 kazu krime akontese iha Timor-Leste. (*)