“Iha fulan 3 (maiu, juñu, jullu) nian inklui primeira semana fulan-agustu, Polísia Tránzitu rejistu kazu asidente kaman 59, kazu todan 11, kazu mate 4, husi kazu hirak ne'e, kazu 11 sei iha prosesu laran, 35 mak rezolve ona tuir familía, maibé iha kazu 4 konsege rejistu iha Ministéru Públiku (MP)”, relata Komadante Tránzitu Munisípiu Baukau, Inspetór Asistente Alfredo M. G. Therik, iha kna'ar fatin, Baukau, sesta (12/08).

Asidente ne'e envolve mós husi karreta Governu hamutuk 4, motorizada Governu 4 inklui karreta privadu no públiku, maibé husi karreta Governu nian parte vítima no motorista rezolve, hodi evakua ona karreta no motorizada refere husi resintu Komandu PNTL Baukau.

Maibé ba karreta privadu no públiku inklui motorizada, balun kontinua sei iha prosesu laran, tanba hetan asidente todan, maibé iha balun na'in foti ona, tanba rezolve.

Ba asidente hirak ne'e hanesan karreta soke animál, motorizada ho karreta soke malu, tanba motorista sira konduz motorizada no karreta ho velosidade maka’as.

“Asidente ne'e barak liu la komprende regra halai ho velosidade tanba ida-ne'e mak sempre hamosu asidente”, afirma nia.

Iha fulan tolu nia laran Komandu PNTL Munisípiu Baukau mós konsege hatama reseita $2.987. (*)