Tanba Ekipa konjunta servisu sekreta kompostu husi servisu Informasaun Polísia (SIP), Servisu Nasionál Intelijensia (SNI) no Sesaun Investigasaun Kriminál Polísia Nasionál Timor-Leste (PNTL) Munisipiu Covalima kaptura joven na’in-haat (4) iha área Salele, Aldeia Ai-Oan, Suku Lalawa Postu-Administrativu Tilomar, Munisípiu Covalima, tanba  uza karreta privadu halo tranzasaun ilegál mina husi Indonzéia.

Tuir informasaun ne’ebé www.tempotimor.com asesu husi pesoál Servisu Informasaun Polísia (SIP) ne’ebé lakohi publika nia naran hatete, Suspeitu timoroan na’in-4 ne’e ho naran inisiál, MA, idade 30, AN, idade 21, FN, idade 17, no suspeitu ne’ebé ho motorizada sai mata-dalan  ho insiál JC, idade  18, sira orijen husi Posto Administrativu Tilomar, Munisípiu Covalima.

“Sidadaun na’in-4 ne’e ita halo kapturasaun ho flagrante de litu, tanba sira iha Karreta laran ho marka Rava ho xapa matríkula 20.558 neebé tula kombustivel iha karreta laran inklui suspeitu motorizada Honda Supra X 125 kór mean ne’ebé sai mata dalan iha prosesu tranzasaun ilegál ne’e”, informa Pesoál Informasaun liuhusi telefone, tersa (19/07).

Ba suspeitu sira iha prosesu inkeritu sira deklara sai na’in ba mina ne’e ho naran inisiál AM, idade 26, husi Aldeia Ahinarai, Suku Debos, Postu-Administrativu Suai Vila no nia sai hanesan Matadalan hodi observa situasaun durante trazasaun.

“Agora dadaun suspeitu na’in-4 ho objetu kontra bandu hirak ne’e ita asegura ona iha Komandu Munisípiu Covalima hodi kontinua halo prosesu investigasaun’, dehan nia.

Entretantu www.tempotimor.com , tenta konfirma asuntu ne'e ba komandante PNTL Munisípiu Covalima, Superintendente Bagilio de Jesus, liuhusi telefone, maibé la atende.

Entretantu Ekipa Konjunta autoridade Seguransa husi Polísia Nasionál Timor-Leste (PNTL) no Falintil-Forsa Defeza Timor-leste (F-FDTL) destakadu iha Fronteira Terestres kaptura tan sidadaun na’in (4), hatama Mina Gazolina masa 13 ho kuantidade 455 litru husi Nasaun Indonézia tama Timor-Leste ho ilegál.

Komandante PNTL Munisípiu Bobonaro, Superintendente Polísia Antonino Mauluta hatete, ekipa konjunta halo kapturasaun ba sidadaun na’in-4 iha liña fronteira, tanba sira hatama mina liu dalan ilegál husi nasaun Indonézia tama iha Timor-Leste.

“Atu informa de’it ita-nia seguransa ekipa konjunta iha fronteira kaptura tan sidadaun timoroan na’in-ha’at (4),  ho naran inisiál ML idade 50, TL idade 32, IDS idade 22 no SDJ idade  40 hela iha suku Saburai, tanba  sira hatama mina gazolina masa hamutuk 13 ho ilegalmente”, dehan António liuhusi komunikadu imprensa, tersa (19/07).

Sidadaun na’in-4 hela iha suku Saburai, bainhira ekipa konjunta halo vizilánsia iha liña fronteira kontrola atividade tranzasaun ilegál konsege deteta sira hatama mina gazolina ho ilegalmente husi nasaun Idonézia mai Timor-Leste iha Aldeia Diruaben, Suku Ritabou, Postu Maliana Munsípiu Bobonaru.

Bainhira ekipa kaptura sidadaun sira halo kedas aprensaun objetu sasán mina gazolina transporta ba komandu PNTL Munisípiu Bobonaru iha prosesu invetigasaun deteta na’in ba mina gazolina ne’e hela iha suku Memo.

“Iha prosesu invetigasaun ita deteta sidadaun sai nain ba mina gazolina ne’e hela iha suku Memo ita orineta kedas ekipa konjunta iha tuku 03:50 madrugada ba tula sidadaun na’in-rua ho insiál TES Ida idade 40 ho RAG Idade 24 iha suku Memo asegura hela Mina Gazoel hamutuk  masa 13 hamutuk litru 70 sira durante ne’e hatama ho ilegál”, esplika nia.

Daudaun suspeitu hamutuk ho evidénsia ekipa konjunta PNTL ho F-FDTL asegura ona iha Komandu Munisípiu Bobonaro hodi kontinua halo investigasaun, hafoin submete ba Ministériu Públiku.

Molok ne’e, komandante UPF Superintende Polúsia Euclides Belo hatete, sidadaun timoroan feto na’in-haat (4) ekipa servisu sekreta UPF-PNTL halo patroillamentu no vizilánsia iha área TCL,12 liña Fronteira hetan sira halo atividade tranzasaun Mina Gazoliña ho ilegalmente husi nasaun Indonézia mai Timor-Leste.

“Sidadaun Feto nai’n-haat (4) ne’ebé ita kaptura  ho insiál hanesan  CM idade 50, YMB idade 31, AV idade 31 no ALP idade 18 hela iha Mota-ain Batugade Munisípiu Bobobaru, tanba sira hatama mina Gasoliña ho ilegalmente tama Timor-Leste”, dehan Euclides.

Ba Mina Gazoliña ne’ebé sidadaun sira hatama mai ne’e hamutuk masa 25 litru 36 ho totál hamutuk 615 llitru mak sira hatama husi nasaun Indonézia mai Timor-Leste liuhusi dalan ilegalmente, tanba ne’e ekipa patrolla hetan halo kedas kapturasaun no apreensaun ba konvustivel hodi halo prosesu invetigasaun.

“Sidadaun na’in-haat (4) ho evidénsia hanesan mina gazoliña ita hodi ba iha kuartel UPF atu entrega ba iha komandu PNTL Munisípiu Bobonaru mak sei halo prosesu invetigasaun hodi submete ba Ministériu Públiku atu foti desizaun”, hatete nia.

Tanba ne’e iha atividade operasaun konjuta PNTL ho F-FDTL kompostu husi Unidade Patroillamentu Fronteira (UPF), Unidade Espesiál Polísia (UEP), Servisu Informasaun Polísia (SIP), J2,  hodi asegura seguransa iha liña fronteira Terestres. (*)