“Atu dehan katak, ohin ha'u mai ho parseiru prinsipál PNTL nian, mak Programa Dezenvolvimentu Polísia Timor-Leste (TLPDP), ne'ebé maihusi Polísia Austrália e ami hetan konvite husi Komisaun B atubele mai aprezenta iha ne'e kona-ba saída mak TLPDP halo ba PNTL durante ne'e e depois saída mak sei haree ba oin”, dehan nia iha PN, sesta (01/07).
Tanba Programa Dezenvolvimentu Polísia Timor-Leste ne'ebé ejiste husi tinan 2004 to’o agora fó ona apoiu lubuk ida ba PNTL, tanba ne'e PNTL lori aprezenta bazeia ba pedidu Komisaun B nian.
“Aprezenta área sira ne'ebé durante parseiru ne'e fó, sira ejiste iha Timor desde 2004 to'o ohin loron tinan 18, e área saída mak sira apoiu ba PNTL”, afirma nia.
Durante ne'e, PDPTL konsege apoiu PNTL iha área importante lima, hanesan kapasitasaun rekursu umanu, lojistika, apoiu operasaun sira ba iha atividade ne'ebé mak lakonsege koloka iha orsamentu, depois ba formasaun lideransa, ikus liu mak infraestrutura.
“Ita-boot sira hatene durante iha pandemia COVID-19 parseiru ida-ne'e apoiu Polísia konstrui Postu sira iha fronteira ba UPF tantu ba Maritima, hanesan iha Dili laran karik imi haree kuandu Postu sira iha Tasitolu, Metinaru, sa'e ba mota konci nia laran ne'e apoiu husi parseiru sira ne'e, ne'e mak ami aprezenta”, dehan nia.
PDPTL mós apoiu PNTL halo dezeñu ba Planu Estratejiku Nasionál to'o iha 2020 até 2038 be'ebé oras ne'e finaliza ona tanba ne’e sei husu ba parseiru atu adjusta sira-nia programa tinan lima ba área temátika importante antes ne'ebé sei implementa iha programa estratejiku refere. (*)