“Orseik kandidatura ho númeru sorteiu 2 mak hala'o kampaña iha Tasitolu, buat hotu la'o ho di'ak, maibé ita-nia parte tránzitu apoiu husi unidade sira iha Dili, halo apreensaun motorizada sira hamutuk 48 ba kandidatura sira tanba sira kontra kodigu Estrada”, dehan Komandante PNTL Munisípiu Dili, Superintendente Xefe Henrique da Costa, iha Kaikoli, segunda (11/04).
Motorizada hirak ne'e PNTL Prende tanba, apoiantes militante no simpatizante husi kandidatura Lú Olo, uza kenal pot recing, la tau espelu, tula ema na’in-tolu ba leten no la tau xapa matríkula inklui la uza kapasete.
Ba hirak ne'e parte tránzitu pasa billete infrasaun ba motorista sira, hodi ba selu iha banku, depois lori resivu ba aprezenta iha tránzitu hodi bele foti hikas sira-nian motorizada.
Nune'e husu mós ba apoiante husi kandidatura José Ramos Horta nia katak, bainhira atu partisipa iha kampaña ho seguru tenke kumpri lei ne'ebeévigor, liliu kódiku estrada nian.
Tanba atu asegura kampaña kandidatura Prezidente, Komandu halo ona enkontru hodi halo avaliasaun, nune'e seguransa ba kandidatu bele la'o di'ak liután.
Entretantu atividade pasa revista iha ámbitu kampaña eleitóral ne’e, Komandu Munisípiu Dili, hetan apoiu husi Kuartel Jerál PNTL, Unidade Polísia Marítima (UPM), Unidade Patrullamentu Fronteira (UPF), no unidade hotu iha Munisípiu Dili. (*)
