“Sim, ohin ita mai sensibiliza matéria balun kona-ba lei nia, ba ita-nia estudante foun sira, liliu kona-ba dekretu lei númeru 5/2017 ne'ebé ko'alia kona-ba armas branca ou arte marsiál no arte rituál, e mós dekretu lei númeru 6/2003 ne'ebé ko'alia kona-ba Kódigu estrada liuliu movimentu transporte rodaviariu iha estrada públiku ba ita-nia estudante sira iha Hera”, dehan Komandante Sesaun Tránzitu Munisípiu Dili, Inspetór Domingos Sarmento Gama, iha auditóriu UNTL, Hera, sesta (08/04).

Sensibiliza Lei hirak ne'eba estudante sira atu hanorin sira oinsá asegura vida bainhira lori transporte la'o iha estrada públiku, no oinsá sira hatene no respeita lei kódigu estrada nia.

"Objetivu husi sensibilizasaun ne'e, hanorin joven sira asegura vida, nomós kona-ba oinsá sira hatene responsável bainhira sira halo krime ruma relasiona uza arma branca ne'e, tanba ikus-ikus ne'e joven sira mak maioria uza arma branca halo krime, nune'e ita mai sensibiliza matéria hirak ne'e ba joven sira para sira bele hatene, tanba dalaruma sira la hatene lei penalidade kona-ba uza armas branca ne'e, entaun sira nafatin uza sasán hirak ne'e hodi halo krime”, esplika nia.

Estudante Foun Fakuldade Enjeñaria Siesia no Teknolojia, Lucas Boavida, sente kontente no agradese ba PNTL, liliu Sesaun Polísia Tránzitu ne'ebé sensibiliza matéria kona-ba lei arma branka no kódigu estrada nia, tanba lei hirak ne'e merese ba joven sira atu hatene.
“Sim matéria ne'ebé ohin Komadante Polísia Tránzitu lori ne'e di'ak no importánte tebes ba ami estudante sira, tanba nia importánsia mak oinsá asegura ita-nia vida bainhira ita uza transporte sira iha fatin públiku, no mós lei penalidade bainhira uza sasán kroat sira”, dehan nia.

Estudante foun tinan akadémiku iha Fakuldade Enjeñária hamutuk 500, husi Departamemtu enjeñaria mekánika, Sivíl, Eletrónika no Eletrika, Informátika, no Jeolojia no Petróliu. (*)