“Sumaflo iha kapitál Dili aat ne'e hanesan buat ida ne'ebé grave tebes, tanba Sumaflo mak la funsiona ne'e perigozu tebes, tanba hamosu asidente iha fatin ne'ebá ho fasil, nune'e husu ba DNTT, karik kompaña ne'ebé servisu hamutuk ho DNTT, kontaktu para hadi’a lalais Sumaflo sira ne'e, inklui tinta iha zebra cross ne'ebé mak lakon hotu ona ne'e”, dehan Komandante Tránzitu Munisípiu Dili, Inspetór Domingos Sarmento Gama, iha komandu munisípiu Dili, Kaikoli, kuarta (23/03).
Ho ida ne’e, bele hamenus asidente iha kapitál Dili, tanba iha semana ida nia laran, PNTL rejistu númeru asidente fatal rua iha área Hera no Bekora.
Asidente fatal ne'e mosu tanba kondutór ida lori karreta ho motorista ida lori motorizada ho velosidade maka’as, la haree ba ema iha oin hamosu asidente fatal.
“Tanba ne'e apela ba motorista sira no kondutór sira, bainhira la'o iha estrada públiku ne'e mak tenke atensaun. Atensaun ba transporte seluk ne'ebé halai iha oin ou sorin sorin, inklui ema sira la'ó ain iha ita-nia oin, kuida ita-nia vida kuida ema seluk nia vida”, apela nia.
Entretantu evidénsia motorizada no karreta, asegura ona iha komandu munisípiu Dili hodi hala’o prosesu investigasaun, no kazu asidente fatal suspeitu prosesu la'o ona no submete ona ba Ministeriu Públiku distritál Dili hodi hein rezultadu. (*)
