Responsavel PNTL Munisípiu Manatuto ba atividade pasa revista, Inspetór Xefe Rui de Araújo Freitas hatete, pasa revista ne’ebé halo ba pasajeiru no Motorista sira husi Diresaun Dili ba Munisípiu no husi Munisípiu ba Dili iha tempu eleisaun.

“Polísia Nasionál Timor Leste Munisípiu Manatutu agora dadaun halo nia planu ida chek point ba pasajeiru sira ne'ebé mak atu tama ba ita-nia kapitál Dili no husi Dili ba Munisípiu, planu ida atu hala'o chek point tanba ita haree besik ona, atu tama ba loron ida ka rua tan ita tama iha votasaun”, dehan Inspetór Xefe Rui Araújo Freitas ba www.tempotimor.com iha Obrato Manatutu, tersa (15/03).

Tanba iha kampaña Prezidensiál mosu ona akontesimentu balun, iha Munisípiu sira nune'e PNTL Manatutu hala'o nia kna’ar hodi hala'o pasa revista ba Motorista sira ne'ebé lori sasán kro'at iha karreta ka motorizada laran, atu redúz konflitu.

“Mosu ona iha problema barak akontese ita haree foin dadauk akontese iha Baukau, Vikeké nomós iha Munisípiu seluk tan, iha balun halo estrundu, destroi sasán sira no balun to'o kanek, nomós mate tanba ida ne'e Polísia Nasionál hala'o nia plnau ida chek point atu nune'e hamenus, maibé ita-nia orientasaun liuba iha sasán kro'at”, afirma nia.

Atividade pasa revista la'ós atu hamate komunidade halo movimentu maibé atu garantia seguransa no ema hotu hotu halo nia atividade maibé tenke tuir regra sira.

Alende ne'e mós sei haree dokumentu karreta no motorizada sira bainhira la kompletu sei aplika tuir lei ne'ebé mak vigora ona.

“Labele lori armas, tanba ita hatene katak iha lei númeru 5 hatete katak, probidu ba arma brankas liuliu hanesan tudik ne'ebé mak bele hamate ema inklui mós dokumentu motorizada no karreta sira”, akresenta nia.

Nune’e mós ba karreta no motorizada sira ne'ebé mak dokumentu la kompletu sei kona infrasaun, no dokumentu sira ne'ebé mak laiha liu sei lori ba PNTL hodi hatene loloos motivu dokumentu laiha.

“Kuandu kona-ba infrasaun sira sei kona koima, ita sei aplika tuir lei tránzitu nian”, deklara nia. (*)