Tuir observasaun www.tempotimor.com nota katak, hahú tuku 8:00 dadersan apoiantes no simpatizante kandidatu prezidente Repúblika Horta hahú nadodon ona ba Tasitolu maske oras kampaña seidauk to’o.
Enkuantu, iha Rotunda Prezidente Nicolau Lobato, Polísia Tránzitu halo apreensaun ba motorizada apoiante kandidatu ho númeru sorteiu 14 nian, tanba la uza kapasete, no balun kanu resing.
Alende iha, iha Postu Tránzitu Tasitolu mós halo apreensaun ba motorizada sira, tanba motirista sira la uza kapasete hodi kontra lei kódiku Estrada.
Rezultadu husi apreensaun ne'e, Polísia Tránzitu konsege halibur motorizada hamutuk 37 iha rotunda Prezidente Nicolau Lobato, no 3 iha Postu Tránzitu Tasitolu.
Xefe Departamentu Seksaun Rodaviaria PNTL, Superintendente, João dos Reis haktuir, apreensaun ida ne'e Polísia Tránzitu halo haree liuba lei kódiku estrada nian.
“Ami husu ba apoiu ba apoiantes, no simpatizante partidu ka kandidatu sira-nian katak, ita halo kampaña maibé tenke ser kumpri nafatin lei kódiku estrada nian, tenke uza kapasete, labele uza kanu rasing, e depois regra sira seluk ne'ebé regula movimentu seguransa rodaviaria nian, no mós seguransa ba pesoál ne'ebé mak uza estrada nomós seguransa ba ema seluk”, dehan Komandante ne'e wainhira akompaña membru sira iha Postu Tránzitu Tasitolu, tersa (15/03).
Durante halo apreensaun ba motorizada sira, komandante ne'e dehan, sira ne'ebé mak polísia halo apreensaun ba sira-nian motorizada tanba sira la kumpri lei kódiku estrada nian.
“Maluk sira ne'ebé halo movimentu tenke uza kapasete, labele uza kanu resing, tenke plat (sapa matrikula), no labele kontra sinál sira ne'ebé mak iha”, dehan nia. (*)