Pesoál PNTL no FALINTIL-FDTL Kontribui Estraga Ró Nakroma

Pasajeiru sira nadodon hadau atu tama ba Ro Nakroma Pasajeiru sira nadodon hadau atu tama ba Ro Nakroma Foto File
Tempotimor (Dili) - Ró Nakorma ne'ebé dala-barak avaria kauza husi tula pasajeiru liu kapasidade, nune'e fó impaktu ba mákina ró nian aat beibeik.
Over kapasidade ne'e akontese tanba mai husi fator balun, ida maka pesoál balun husi PNTL no F-FDTL, ne'ebé 'obriga' hasae pasajeiru sira no kargo maski liu ona kapasidade.

"Dala-ruma iha oknum balun ba lori ema rua-tolu, sira fasilita iha ne'ebá. Dala-ruma iha Polisia no Forsa,"  dehan Prezidente Aportil, Flávio Cardoso Neves, ba www.tempotimor.com, iha nia knaar fatin, Farol, Segunda (10/08).

Flávio hatutan, nia sempre hateten ba oknum sira ne'e katak Aportil perparadu atu ajuda membru Polisia ka FALINTIL-FDTL, kuandu sira mai hasoru hatudu kartaun, siginifika sira iha misaun importante ne'ebé atu halo.

"Durante ami halo hela suporta sira, ita mós lakohi sira mai hodi tan ema seluk, ne'e mak ita buka meiu atu halakon ida ne'e," dehan nia.

Fator seluk maka pasajeiru ho menór husi tinan 17 gratuita, nune'e inan-aman balun aproveita sosa billete ida maibé labarik na'in rua to'o neen.

Enkuantu, Aportil rasik laiha regra klaru atu la simu labarik menoridade, tanba uluk rezolusaun Primeiru Ministru foti, ba presu katak labarik ne'ebé tinan 17 ba karaik la selu (gratuita).

"Over kapasidade halo pezu Ró Nakroma over kapasidade, ezemplu tiketi fa'an 300 mak ema ida mai lori tan ida ne'e double ba 600 passajeiru ona," dehan Flávio.

Kauza seluk, tuir Flávio, hanesan billete bainhira ró atu arranka ona mak foin faan.

Ne'e duni, fo ona instrusaun ona atu fa'an billete semana ida, servisu semana ida husi Segunda too Sábadu, nune'e bele minimiza over kapasidade.

Nune'e, Prezidente Aportil rasik sei koodernasaun no atu bele kria regra hodi regulariza atu sira ne'e.

Entertantu, Ró Nakroma rasik iha kapasidade tula tonelada 140 ne'ebé inklui ona sasán (kargo) no passajeiru. (*)  
 
Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.