“Ha'u dehan Prezidente gagal, tanba ita-nia estabilidade polítika ne'e laiha, nia implikasaun ba governasaun ate a data Governu la bele halo buat ida, entaun ita lakoi para Prezidente ida mai ne'e, hanesan ne'e, mosu tan dala ida”, dehan nia iha kna’ar fatin Luta Hamutuk Farol, tersa (22/02).
Tanba Prezidente Repúblika, Francisco Guterres ‘Lú Olo’, la susesu husi tempu Governu Aliansa Maioria Parlamentar (AMP) monu, tanba hakarak uza poder ne'ebé iha halo interpretasaun lei, ikus mai implika ba estabilidade polítika.
“Kualker sé de'it kandidatu na'in-16 ne'ebé mak sei hetan konfiansa husi ita-nia povu atu asume kargu nu'udar Prezidente Repúblika, primeiru tenke przidente ba Timor tomak”, hatete nia.
Antes to'o iha ne'ebá iha prosesu naruk ida, sei tama ba prosesu kampaña, tanba ne'e Luta Hamutuk husu para kandidatu hothotu tenke uza ninia matenek, ninia rekursu ne'ebé mak iha atu la bele kria konflitu.
“Ida seluk mak ita presiza Prezidente ida ne'ebé mak akumulativu, bele hakuak ema hotu la haree husi kór partidu nian, tanba ita haree Arte Marsiál ho buat sira ne'e, ne'ebé ita bele Prezidente ba parti ida, ita tenke Prezidente ba ema hotu”, afirma nia.
Maske iha Kandidatura balun ne’ebé ko'alia bainhira eleitu sei hadi’a eskola, irrigasaun, maibé la’ós kompetensia Prezidnete Repúblika ne’ebé kandidatu sira entende Sistema semi-prezidensiál.
Tanba orgaun altu Prezidente Repúblika bele bolu Governu atu bele rona opiniaun no hato'o preokupasaun povu nian ba Governu, oinsá atu jere, , la'ós prezidente rasik mak atu halo.
“Ha'u husu tan dala ida ita-nia kandidatu sira labele ko'alia kona-ba oinsá atu hadi’a infraestrutura lalikan ko'alia”, esplika nia.
Tuir joven, Dircia Lucia da Costa Pereira (20) hakarak, Prezidente Repúblika ba tinan lima mai la bele haree liuba sistema família maibé akumula povu tomak.
“Ami hakarak Prezidente ida agroa ne'e, atu la bele haree liuba sistema família, no presiza haree mós eskola, saúde, haree ba eduksaun tanba joven barak eskola remata ona iha universidade maibé servisu laiha”, dehan nia. (*)
