"Ami konvida de'it autoridade lokál husi munisípiu Dili nian, inklui mós ministériu relevante sira, tanba sei estabelese sentru votasaun paralelu ne'ebé antende ita-nia sidadaun sira ne'ebé mai husi munisípiu, liliu estudante sira mai husi munisípiu iha Dili ho tan sira ne'ebé akompaña ita-nia maluk sira iha ospitál, negosiante sira, iha tempu eleisaun posibilidade sira sei la fila ba sira-nia fatin tanba kestaun transporte nomós aspektu ekonomia", dehan Prezidente CNE, José Agostinho da Costa Belo, iha salaun Laline Larigutu, Kolmera, sesta (28/01).

Tanba lei fó solusaun ba sidadaun atu rejistu iha Dili, liliu iha fatin sira ne'ebé STAE preprapara ona, atu fasilita sira lalika ba fali munisípiu, no sira bele iha tempu atu fó sira-nia votu no asidente sira ne'ebé mosu iha tinan hirak liuba bele evita.

Diretór Jerál Sekretariadu Tékniku Administrasaun eleitoral (STAE), Acelino Manuel Branco hatete, esensia husi enkontru alargada ho autoridade munisípiu, ministériu relevante sira, atu fó apoiu másimu ba prosesu eleitorál.

"Ohin ita konvidade entidade relevante sira liliu iha kapitál Dili, ne'ebé mak ita sei implementa prosesu ida foun iha prosesu eleisaun nian, mak sei implementa votasaun iha sentru votasaun paralelu", katak nia.

Iha implemetasaun sentru votasaun paralelu nia mekanizmu sei envolve entidade relevante oioin hanesan, Funsaun Públika, Ministériu Edukasaun, Universitáriu sira, Ensinu Superior, Ministériu Edukasaun, nune'e mós liu rai xefe suku sira oinsá atu garante sentru votasaun paralelu ho susesu.

"Maibé ita hotu hatene katak, prosesu eleitorál ne'e, prosesu ida envolve ita-nia sidadaun sira, sidadaun sira hela iha área ne'ebé hola husi entidade relevante sira-nia supervizaun, resposabilidade, entaun oinsá para garantia sira-nia direitu votu, presiza envolvimentu sira-nian atu oinsá bele halo movilizasaun, sosializasaun informasaun ne'ebé relasiona ho prosesu eleisaun", esplika nia.

Tanba ne'e mak konvida de'it xefe suku Dili ninian atubele esplika ba sira hodi hatutan, informasaun ne'e ba komunidade enjerál iha ida-idak nia suku, oinsá atu ba rejistu iha sentru votasaun paralelu.

Entretantu, Sentru votassaun iha nível nasionál hamutuk 1.191, iha diaspora 9, Dili 150-resin iha tolu (3) mak sei estabelese nu'udar sentru votasaun paralelu ne'ebé sei lokaliza iha Dili Leste, Dili Sentrál no Dili Oeste. (*)