“Antes Lere Anan Timur mosu, hanesan iha ona dúvida oituan kuandu re-kandidata Prezidente Lú Olo ninian, kandidatura ne’e hanesan independente ka husi FRETILIN”, dehan nia ba www.tempotimor.com iha PN, kuarta (19/01).

Desizaun ne’ebé anunsia ona, presizamente orgaun partidu hanesan Komité Sentrál FRETLIN no Komisaun Polítika Nasionál tenke reuni atu halo jestaun, bainhira ida ne’e la akontese, siknifika lideransa fó dalan no liberdade ba militante no kuadru hotu atu apoiu kandidatura ne’ebé de’it tanba laiha desizaun husi partidu.

Dadauk mosu mós notísia kona-ba kandidtaura Lere nian, ofisialmente hanesan membru CPN-FRETILIN seidauk hatene Tenente Jenerál Lere Anan Timur ninia kandidatura maibé kuaze ema hotu dehan ona, no Lere rasik mós ko'alia ona atu kandidata-an iha Eleisaun Prezidensiál.

Prosesu demisaun ho reforma Jenerál Lere mós hato'o ona atu filafali ba vida sivíl, tanba ne'e, kandidatura sira ne’e mosu iha FRETILIN nia laran bele na’in-rua, maibé parte CPN la haree tanba FRETILIN seidauk deside.

Ba serimónia anunsia kandidatura ne’ebé iha ona ne’e, parte CPN/Partidu FRETILIN mós preokupa no nu’udar membru sei husu liuhusi dokumentu ida, atu lideransa iha Partidu bele esplika, tanba ida ne'e halo konfuzaun ba kuadru militante sira, wainhira Lere mosu.

Ho ida ne’e presiza mós kuidadu asuntu ida ne'e, tanba atu defende ida ne’ebé, kandidatu mós kuadru no militante sira tenke hatene loloos partidu ninia desizaun, tanba tuir estatutu ne’e, nia bele hetan mós sansaun, kuandu hanesan ema no militante ruma ne’ebé sein rona partidu ninia desizaun, maibé ko’alia ona dehan apoia kandidatu. 

Tanba kaer ba estatutu partidu FRETILIN nian, wainhira laiha desizaun husi orgaun CPN-CCF, ida ne’e difísil oituan ba kuadru no militante sira atu deklara apoiu kandidatura.

"Ne'e mak hanesan kandidatu rua bele mosu, entaun iha ida ne’e, lahatene partidu ninia desizaun ne’e atu oinsá maibé partidu hahú ona defende re-kandidatura prezidente Lú Olo ninian, mais sein desizaun husi orgaun rua, Komisaun Politika Nasional ho CCF. Ne’ebé ami mós hanesan tau interoagasaun (?)”, esplika nia.

Maske Prezidente FRETILIN atual Prezidente Repúblika, Francisco Guterres ‘Lú Olo’, ne’e hanesan lideransa ne’ebé iha nia pozisaun polítika, maibé re-kandidatura ne'e, la ko’alia dehan prezidente partidu mak re-kandidata ka nia rasik kandidatu nu’udar independente no nia rasik mós husu FRETILIN ninia apoiu kona-ba ninia kandidatura.

Ho ida ne'e, nu’udar membru CCF, la ko’alia tanba tuir loloos lideransa mak rona pedidu ida ne’e atubele mobiliza rekursu hothotu atu apoiu re-kandidatura ida ne’ebé  loos.

Normalmente tuir regra estatutu ninian ne’e sempre orgaun rua partidu nian  CPN ho CCF ne’e tenke reuni atu hola desizaun. (*)