Tempotimor (Dili) – Deputadu husi bankada Kmanek Haburas Unidade Nasionál Timor Oan (KHUNTO), Luis Roberto husu Parlamentu Nasionál atu reduz osan Viajen ba estranjeiru no aumenta osan viajen iha rai laran nian.
"Di'ak liu aumenta orsamentu ba viajen lokál ne'e barak liu, para ita tuun ba kraik para haree povu nia moris, ba estranjeiru manan saida?" hatete deputadu Luis Roberto iha ninia intervensaun ba debate Orsamentu Privativa ba Parlamentu Nasionál, Tersa (17/09/19).
Tuir deputadu ne'e, kona-ba viajen estranjeiru ninian entre kooperasaun bilaterál Parlamentu Timor-Leste no parlamentu nasaun seluk nian, sei iha karta konvite.
"Kona-ba estranjeiru nian, kooperasaun bilaterál Parlamentu ida ho Parlamentu seluk ha'u fiar katak konvite sei mai para ita ba partisipa, no ita mós konvida sira para mai partisipa iha Parlamentu ne'e. Ita hotu akompaña," dehan Luis Roberto.
Nia afirma, tinan kotuk PN promete sei fó tempu ba deputadu foun sira hodi halo estudu viabilidade iha rai liur. Maibé, nia dehan, ida ne'e hanesan liafuan de'it. La akontese.
Entretantu, Prezidente Parlamentu Nasionál, Arão Noe de Jesus da Costa Amaral katak kona-ba ida ne'e, depende ba deputadu sira atu reduz iha item ida ne'ebé.
"Agora, plenaria iha kompetensia para reduz to'o tiha zero mós bele. Ida ne'e, kompetensia plenaria. Ne'e mak ohin ha'u dehan, se reduz to'o tiha zero ha'u fó parabens," dehan Arão.