“Sira ne'ebé seidauk hetan servisu ruma hanesan agrikultór baibain ne'ebé aguenta de'it moris ne'e monta lai meteran baibain, bainhira sira-nia rendimentu iha ona mak ita foin bele monta”, dehan nia iha edifísiu Luta Hamutuk Farol, kuarta (05/01).

Iha mós preoblem seluk ne’ebé komunidade sira enfrenta kona-ba distánsia hola pulsa kuaze dook, tanba iha Munisípiu Vikeké, aldeia Kailoi bainhira Komunidade atu asesu pulsa ne'e tenke la’o to’o iha Villa.

“Ita sa’e motorizada kuaze 15 minute ka 20 minute mak foin to'o no ba ne'ebá selu karreta karik US$1 ba mai US$2, invez US$1 ne'e ba pulsa atu uza ba fula ida ita selu uluk ba transporte. Entaun bainhira atu monta prepagu tenke hakbesik mós sentru fa’an pulsa iha komunidade nia leet atu sira hola ne'e besik iha ne'ebá, hanesan iha Ermera hothotu ne'e mai iha Gleno sa'e mikrolet mak mai, sa'e karreta anguna mak mai hola”, hatete nia.

Tanba ne'e halo jestaun ne’ebé di'ak, tenke ánaliza situasaun, kondisaun real povu nian ne'e oinsá, atu monta programa, labele haterus fali komunidade.

Nune’e husu ba Ministériu Obras Públika (MOP) atu fó hanoin mós ba diresaun EDTL ninian oinsá atubele haree ida ne'e.

“Ha’u prefere liu pulsa sira ne'e fa’an hanesan mós sira ne'ebé fa’an pulsa telefone ninian, bele fa’an iha kios sira ne'e, atu ema bele mai hola avontade, ita la bele estraga ita-nia povu ne'e tan de'it atu tur iha ahi tenke la'o dook distánsia kilometru haat, lima kadavez kilometru sanolu tan, ne'ebé husu ba ministériu relevante atu haree sasán sira ne'e ho di'ak nune'e povu ne'e sente kontente oituan”, afirm nia.

Antes ne'e, Vise Prezidente Konsellu Administrasaun no Komisáriu Ezekutivu Atendimentu Korporativus EDTL, José Belo hatete, iha tinan 2022, EDTL mós sei halo kooperasaun ho ajensia balun ne'ebé iha finanseiru atu loke fatin fa’an pulsa eletrisidade iha munisípiu. (*)