"Iha 6-7 janeiru 2022, Prezidente Repúblika sei rona partidu polítiku sira ho asentu iha Parlamentu Nasionál atu hatene sira-nia hanoin kona-ba data eleisaun prezidensiál ne’ebé sei akontese, pelu menus, loron neennulu, molok Prezidente atuál ramata ninia mandatu iha 20 maiu 2022", dehan Xefe Kaza Sivíl Prezidente Repúblika, Francisco Maria de Vasconcelhos, liuhusi Komunikadu Imprensa ne'ebé www.tempotimor.com asesu, kuarta (05/12).

Tanba, tuir artigu 12 husi Lei númeru 7/2006, 28 dezembru, ho alterasaun susesivas ba Lei ne’e, Prezidente Repúblika tenke rona uluk Governu no partidus polítiku sira ho asentu iha Parlamentu Nasionál, molok dekreta data eleisaun ba Prezidente Repúblika.

Tuir ajenda, iha loron 6 janeiru, Prezidente Repúblika, Francisco Guterres Lú Olo sei hala’o enkontru ho Partido Democrático (PD), Partido da  Libertação Popular (PLP),  Frente Mudança (FM), Frente Revolucionária de Timor-Leste Independente (FRETILIN). 

Nune’e iha loron 7 janeiru, sei hala’o reuniaun ho Partidu Unidade Dezenvolvimentu Demokrátiku (PUDD), Congresso Nacional para a Reconstrução de Timor-Leste (CNRT), Kmanek Haburas Unidade Nasional Timoroan (KHUNTO) no União Democrática Timorense (UDT).

Molok halo enkontru ho lídere partidu polítiku sira-nian, Prezidente Repúblika rona tiha ona Governu, liuhusi Primeiru Ministru, Taur Matan Ruak no Ministru Administrasaun Estatal, Miguel Carvalho. 

Prezidente Repúblika rona mós  Komisaun Nacional Eleisaun (CNE) no Sekretariadu Tékniku Administrasaun Eleitorál (STAE) kona-ba preparativu ba eleisaun prezidensiál 2022.

Ba eleisaun prezidensiál tinan 2022, númeru  sentru  votasaun no estasaun votu sei aumenta iha territóriu Timor-Leste tomak. Ba eleisaun antesipada 2018, iha sentru votasaun 885. Ba eleisaun prezidensiál 2022,  sentru votasaun sei aumenta ba 1200. 

Númeru estasaun votu sei aumenta husi 1260 (iha 2018) ba 1500, iha tinan 2022. 

Hasa’e númeru sentru votasaun no estasaun votu permite hakbesik liután fatin votasaun ba eleitór sira no nune’e, maioria ho otas 17 ka liu, ne’ebé rejista iha STAE, bele ezerse sira-nia direitu atu hili Prezidente Repúblika ba mandatu 2022-2027. Nune’e, taxa partisipasaun eleitór sei sa’e iha eleisaun tuir mai.

Ho númeru sentru no estasaun barak liu, númeru votante iha fatin ida-idak sei menus. Tanba buka hamenus númeru eleitór halibur iha fatin ida, Governu foti medida di’ak ida atu proteje mós sidadaun husi vírus moras Covid-19 nian, ne’ebé sei la’o nafatin iha mundu, ho variante oioin. (*)