"Se o ba estuda iha Indonézia ba Bali bele aprende liután tanba sira servisu maka’as disiplina, ba Xina, Japaun rai sira ne'e ba Wisuda iha ne'ebá, neneik manán kultura seluk, agora ita iha ne'e de'it, o estuda iha ne'e, hela iha ne'e, tinan lubuk ida muda kultura ida pontualidade ne'e laiha, Avo Nana mós pontualidade laiha, enkontru ho nia, dalaruma nia haluha tiha, Prezidente Lú Olo mós dalaruma atrazadu, Taur Matan Ruak maka disiplina pursentu 100", dehan Ramo Horta hafoin Simu Vasina Pfizer iha nia rezidénsia Metiaut, tersa (04/01).

Iha mós membru Governu sira ne'ebé laiha pontualidade iha servisu.

"Ne'e kuaze tradisaun Timoroan nian, marka tuku  7,  tuku 10 mak hahú, maibé reuniaun Konsellu Ministru ha'u hakfodak, tanba Taur Matan Ruak nia rigorozu tebtebes, uluk ha'u prezidente tinan lima nia laran nia  xefe estadu maior nunka atrazadu, ami enkontru sesta-sesta tuku  9, minutu 10 para 9 nia iha ne'ebá ona", afirma nia.

Maibé Ministru sira mesmu ho Taur ema ida militar rigorozu, sira atrazadu, ne'e tradisaun ona kultura Timor nian, ne'e so lori tempu atu muda.

Enktuantu kostume ida ne'e, sei la fó impaktu ba embaixada sira iha Timor, tanba sira mós abituadu ona, sira hatene tiha ona, sira ladun hirus, sira mós to’o gosta tan tanba rilex oituan. (*)