"Ha'u husu ba mídia komunikasaun sosiál atu fó porsaun hanesan ba kandidatura sira ba rádiu televizaun sira fó mós antena hanesan ba kandidatura sira para sira bele espresa sira-nia atividade”, dehan Ministru Francisco Martins ba jornalista iha Rezidénsia PM Taur Matan Ruak, Faról, segunda (03/01).

Tanba iha politika Governu nian ne'ebé dadaun ne'e Governu hakarak mak mídia sira halo balansu ba kandidatura hotu ne'ebé hakarak kompete iha eleisaun Prezidensiál no eleisaun Parlamentár ne'ebé sei mai.

"Ida ne'e mak polítika Governu nian husi atu mídia hothotu ne'ebé mak iha labele halis de'it b sorin balun maibé se bele karik fó antena hanesan hotu tuir lei atubele garante estabilidade liliu iha komunikasaun sosiál, ita hothotu fó mós antena hanesan”, afirma nia.

Ministru Administrasaun Estatal (MAE), Miguel Pereira de Carvalho informa, Sekretariadu Tékniku Administrasaun Eletorál (STAE) dadaun ne'e preparadu ona, atu realiza Eleisaun Prezidensiál iha tinan oin (2022).

"STAE iha tempu agora dadauk preparadu los, atubele realiza eleisaun Prezidensiál iha tinan oin", dehan Ministru Miguel.

Preparativus ne'ebé STAE halo ona hanesan, faze ida agora mak, hahú ona konklui rekrutamentu ba brigadista sira hamutuk 200, no iha tempu tuir mai sei rekruta mós esensia eleitór hamutuk rihun 15, atu servisu iha sentru votasaun no estasaun votasaun iha territóriu Timor-Leste.

"Ekipamentu hothotu STAE halo akizasaun hotu ona, únika ekipamentu ne'ebé foin mak konklui nia prosesu mak tinta, maibé Governu servisu hamutuk ona ho UNDP atu hodi tinta ne'e mai, no iha inisiu fevereiru tinta sira ne'e sei to'o iha Dili, nune'e bele konklui preparativu lojistika sira hotu atu eleisaun bele halo iha marsu", infoema nia.

Ekipamentu material ba eleisaun ne'e, Governu dezagrega ba forma rua, ida material sensitivu, nomós sira ne'ebé la sensitivu.

Haree ba materia la sensitivu sira hanesan, material deskritoriu sira no seluk tan. No material ne'ebé sentivu ne'e hanesan, boletin votu, selus, kabinu votu, maibé sira ne'e preparadu hotu ona, STAE halo empakotamentu no agora haruka hotu ona ba munsípiu sira.

"Ne'ebé lojistikamente STAE preparadu atubele realiza eleisaun Prezidensiál 2022", deklara nia. (*)