Maske Mate isin Bispu Baukau hetan kedas vizita husi membru Parlamentu Nasionál (PN) no líder Igreja sira maibé liderasaun nasaun nian seidauk ida mak vizita matebian iha Mortuariu.

Liu tiha oras balun, Primeiru Ministru (PM), Taur Matan Ruak hato'o kedas nia sentimentu tristeza no Sokadu kona-ba Bispu Dioseze Baukau nia mate iha loron sábadu (30/10).

“Ha’u sente sokadu, triste no lamentável tebes, wainhira rona notisia tristeza kona-ba Amu Bispu Baukau Dom Basilio do Nacimento nia mate ne'ebé derrepente de'it, ha’u la espera katak ita-nia Amu Bispu bele hasoru situasaun hanesan ne'e, maibé ne'e Maromak nia planu ita hotu la hatene”, dehan PM Taur liuhusi nia Komunikadu Imprensa ne'ebé www.twmpotimor.com asesu, sábadu (30/10).

Nune'e Governu Timor-Leste nia naran, hakarak hato'o profunda sentidas kondolénsia ne'ebé klean ba família hosi Amu Bispu nian em partikular, sarani Dioseze Baukau no Uma Kreda Timor-Leste ba lakon bibi atan di’ak ne'ebé serbii ona Dioseze Baukau besik tinan 25.

Lamenta tebes ho notísia tristeza ida ne'e maibé Maromak mak determina.

Dadaun ne'e Prezidente Episcopal Timorense Bispu Dioseze Maliana Dom Norbertu Amaral, mak iha dalan atu vizita no aumesmu tempu hodi fó hatais batina. (*)