Tanba ne’e, Governu deside ho medida prevensaun ne’ebé administrasaun públika Sei la atende sidadaun seidauk vasina no infetadu Covid-19.

"Kona-ba medida sira ezekusaun deklarasaun Estadu Emerjénsia anterior nian, rejista de'it alterasaun ida, no estabelese ona katak hodi hetan asesu ba servisu administrativu balun tenke komprova vasinasaun kompleta kontra SARS-CoV-2/COVID-19, ka iha alternativa, tenke komprova rezultadu negativu iha teste detesaun SARS-CoV-2COVID-19, ne'ebé hala'o ho antesendensia labele liu loron lima”, dehan Ministru Prezidénsia Konsellu Ministru, Fidelis Leite Magalhães, iha palásiu Governu, kuarta (27/10).

Ho ida ne’e bele hatan ba pandemia Covid-19 nian, tanba ne'e dadaun renova ona Estadu Emerjénsia (EE) iha territóriu laran tomak hahú (30/10) to'o (28/11).

Iha mós regra sira seluk mantein nafatin, obriga ema hotu ne'ebé mak hela iha Timor-Leste atu mantein distánsia, pelumenus metru ida ho ema seluk ne'ebé la hela iha fatin hanesan.

Kontinua mós obriga atu uza máskara oin nian ne'ebé taka inus no ibun bainhira hakarak atu tama ka hela iha fatin públiku ka privadu sira ne'ebé mak ema hotu uza, no fase liman bainhira hakarak tama iha estabelesimentu komersial, industrial ka prestasaun servisu sira, ka edifísiu sira ne'ebé mak servisu administrasaun públika nian funsiona.

Durante vijensia Estadu Emerjénsia, lisensa, autorizasaun, vistu no autorizasaun rezidénsia no aktu administrativu sira-seluk sei válidu nafatin, la haree ba nia prazu validade. (*)